«Համաճարակների առկայության պարագայում ուսումնական հաստատությունների փակումը կանխարգելիչ դասական միջոցառում է, եւ դրա մեջ արտառոց ոչինչ չկա»,- դեկտեմբերի 8-ին լրագրողների հետ հանդիպման ժամանակ հայտարարեց ԱԺ առողջապահության հարցերի մշտական հանձնաժողովի նախագահ Արա Բաբլոյանը։
Նշելով, որ A/H1N1 գրիպի՝ «խոզի գրիպի», տարածման կանխարգելման համար նախեւառաջ պետք է պահպանել հիգիենայի կանոնները, ոլորտի ներկայացուցիչը կոչ արեց կասկածելի ախտանշաններ նկատելու դեպքում անհապաղ դիմել բժշկի, ով եւ կարող է ախտորոշել՝ «խոզի գրիպի» դեպք է դա, թե պարզապես սեզոնային գրիպ է։
Հիվանդության կանխարգելման մեկ այլ արդյունավետ միջոց դիտարկելով զանգվածային պատվաստումները՝ Ա. Բաբլոյանը տեղեկացրեց, որ այդպիսիք Հայաստանում դեռեւս չեն իրականացվում, եւ միջոցառումները կսկսվեն միայն այն ժամանակ, երբ կառավարությունը Հայաստան կներմուծի պատվաստանյութի անհրաժեշտ քանակը։ Դիտարկմանը, թե A/H1N1 գրիպի դեմ պատվաստանյութի մասին տեղեկությունները հակասական են եւ, տեղեկությունների համաձայն, ալերգիկ ռեակցիաներ են առաջացնում պատվաստվողների շրջանում, մասնագետը նկատեց, որ նման տեղեկություններ իրականում կան եւ ընդգծեց, որ յուրաքանչյուր մարդ պատվաստվելուց առաջ նախեւառաջ պետք է համապատասխան ստուգումներ անցնի։ «Հայաստանում ֆրանսիական դեսպանատունն, օրինակ, երեք օր է, ինչ իր քաղաքացիների շրջանում A/H1N1 գրիպի դեմ պատվաստումներ է իրականացնում, եւ անհանգստացնող արդյունքներ մինչ այժմ չեն գրանցվել»,- եզրափակեց Ա. Բաբլոյանը։