Եվրամիության արտաքին կապերի եւ ընդհանուր հարցերի նախարարների խորհուրդը նախատեսում է Հայաստանի, Վրաստանի եւ Ադրբեջանի հետ ասոցիացված անդամության հարցերի համաձայնության շուրջ բանակցություններ սկսել։ Դեկտեմբերի 8-ին հաստատված Խորհրդի եզրակացություններում այդպիսի որոշում կա, որը վերաբերում է հատկապես Հարավային Կովկասի երկրներին։ Փաստաթղթում նշված է, որ ԵՄ-ն մոտ ժամանակներս նախատեսում է հաստատել բանակցությունների սկսման համար անհրաժեշտ համապատասխան որոշումները։
«Խորհուրդը ողջունում է ասոցիացված անդամության մասին բանակցությունների ծրագրի դիրեկտիվների ներկայացումը, որոնք ուղղված են ամբիցիոզ եւ ընդգրկուն համաձայնությունների ձեռքբերմանը, եւ որը առաջ է անցնում գործող պարտավորություններից, հաշվի առնելով յուրաքանչյուր երկրում առկա առանձնահատկությունները»,- նշված է ԵՄ նախարարների խորհրդի եզրակացությունում։
Փաստաթղթում նշված է նաեւ տարածաշրջանի Առեւտրի համաշխարհային կազմակերպության անդամ երկրների հետ խորը եւ բազմակողմանի ազատ առեւտրային գոտի ստեղծելու ԵՄ պատրաստակամության մասին։
«Խորհուրդն ընդգծում է քաղաքական ասոցիացիաների եւ ԵՄ-ի գործընկեր երկրների տնտեսական զգալի ինտեգրացիայի կարեւորության մասին»,- ասված է եզրակացությունում։
Խորհուրդը ողջունել է Հայաստանի, Ադրբեջանի, եւ Վրաստանի Եվրամիության հետ հարաբերությունները խորացնելու պարտավորությունը, եւ պատրաստակամություն է հայտնել հետագայում եւս նպաստել Հարավային Կովկասում կայունությանը, համագործակցությանը եւ բարեկեցությանը, այդ թվում՝ պատրաստակամություն հայտնելով աջակցել տեխնիկական ծրագրերի տրամադրման միջոցով։
Տեղեկանենք, որ այսօր Բրյուսելում ընթանում է Եվրամիության արտաքին կապերի եւ ընդհանուր հարցերի նախարարների խորհրդի նիստը, որի շրջանակում նախատեսված է «Արեւելյան գործընկերության» անդամ երկրների նախարարների համաժողովը։ Համաժողովին կմասնակեն ԵՄ եւ «Արեւելյան գործընկության» անդամ երկրների արտգործնախարարները։