2008 թվականին վախճանված ընդդիմադիր օլիգարխ Բադրի Պատարկացիշվիլին Վրաստանի Պաշտպանության նախարարության նախկին բարձրաստիճան աշխատակից Սանդրո Քավսաձեին առաջարկել էր վերացնել նախագահ Միխայիլ Սահակաշվիլիին:
Նման սենսացիոն հայտարարությամբ «Ասավալ-դասավալի» թերթում տված հարցազրույցում հանդես է եկել Ռուսաստանում ապրող փոխգնդապետ Սանդրո Քավսաձեն, որը նախկինում եղել է Վրաստանի պաշտպանության նախարարության հետախուզական վարչության ղեկավարը:
Նա հայտարարել է, որ այդպիսով Բադրի Պատարկացիշվիլին ցանկացել է վրեժ լուծել նախկին վարչապետ Զուրաբ Ժվանիայի մահվան համար, որը վախճանվել էր 2005 թվականին, ըստ պաշտոնական վարկածի` գազի թունավորումից: «Ժվանիային սպանել էին, քանի որ նա Սահակաշվիլիի համար վտանգ էր ներկայացնում, ցանկանում էր վերցնել իշխանությունն իր ձեռքը: Ժվանիան եւ Պատարկացիշվիլին ցանկանում էին տապալել Սահակաշվիլիին», - պատմել է Քավսաձեն, հաղորդում է «ՎԶԳԼՅԱԴ»-ը:
Պաշտպանական գերատեսչության նախկին աշխատակցի խոսքով` սկզբում Սահակաշվիլիին վերացնելու համար Պատարկացիշվիլին Ռուսաստանում վարձել է երկու մարդասպանների, որոնք բնակվում էին գաղտնի բնակարանում, բայց պատահաբար բացահայտվել էին, երբ ստիպված սպանել էին բնակիչների մոտ ստուգման եկած ոստիկանին: Դրանից հետո Պատարկացիշվիլին հրամայել է սպանել վարձկաններին, որպեսզի նրանց մասին տեղեկատվությունը հանրության սեփականություն չդառնա: Սպանված մարդասպանների դիակները տեղափոխել են Աբխազիա, ասել է Քավսզաձեն:
Դրանից հետո Պատարկացիշվիլին նրան 50 մլն դոլար է առաջարկել Սահակաշվիլիին վերացնելու համար, բայց փոխգնդապետը հրաժարվել է: