Հայաստանի գլխավոր դատախազ Աղվան Հովսեփյանն այսօր` ապրիլի 23-ին, ընդունել է Հայաստանում Չինաստանի դեսպանի ժամանակավոր պաշտոնակատար Ժաո Մինվենի գլխավորած պատվիրակությանը եւ քննարկել երկու երկրների իրավապահ մարմինների համագործակցությանը վերաբերող հարցեր:
Դեսպանի պաշտոնակատարը հայտնել է, որ ՉԺՀ գերագույն ժողովրդական դատախազությունն ընդունել է ՀՀ գլխավոր դատախազի հրավերը, եւ 2012թ. հունիսի 9-ից մինչեւ 12-ն ընկած ժամանակահատվածում Չինաստանի գերագույն ժողովրդական դատախազ Ցաո Ցզյանմինի գլխավորած պատվիրակությունը կայցելի Հայաստան:
Կողմերը վստահություն են հայտնել, որ այն խթան կհանդիսանա համագործակցության զարգացման համար` նախանշելով կոնկրետ ուղղություններ:
Ի դեպ նշենք, որ Հայաստանի եւ Չինաստանի դատախազությունները համագործակցության մասին հուշագիրն ստորագրել են դեռեւս 1998թ.:
