Չինաստանի հանքահորերից մեկում հերթական պայթյունն է որոտացել. զոհվել է 9 հանքափոր, 16-ը վնասվածքներ են ստացել:
Դեպքը տեղի է ունեցել Բայանուր քաղաքի «Սինյա» հանքահորում (Ներքին Մոնղոլիայի ինքնավար շրջան):
Ինչպես փրկարարներին վկայակոչելով տեղեկացնում է rbc-ն, տուժածներից չորսը տեղում են մահացել, հինգը մնացել են հողի տակ եւ խեղդվել: Նրանց մարմինները հանվել էին փլատակները հեռացնելուց հետո, ինչն ութ ժամ է տեւել:
Միայն այս տարվա առաջին եռամսյակում Չինաստանի հանքերում տեղի են ունեցել 185 վթարներ, որոնք հանգեցրել են 289 մարդու մահվան:
2011 թվականին Չինաստանում 1201 վթարի հետեւանքով զոհվել են 1973 մարդ, 2010-ին` 2433, 2009-ին` 2631: Մարդկանց մահվան հիմնական պատճառը եղել է մեթանի պայթյունը կամ փլուզումը:
