Թերթը գրում է, որ նախընտրական քարոզչության այս շրջանում գործող նախարարներից ամենաակտիվը գյուղատնտեսության նախարարն է, ով հասկացել է, որ միայն իր կուսակցությանը պատկառելի քվեներ բերելու արդյունքում կարող է շարունակել նախարար աշխատել:
«Նա ինտենսիվ աշխատանք է տանում այդ ուղղությամբ եւ այս շրջանում շատ է այցելում մարզեր, նաեւ իր մոտ հաճախակի աշխատանքային խորհրդակցություններ է հրավիրում, որոնց ժամանակ ուղղակի կամ անուղղակի հասկացնում է, որ պետք է ձայներ բերեն ՕԵԿ-ին:
Բայց իր ենթակայության տակ աշխատողների մեջ շատ են այլ կուսակցությունների, մասնավորապես Հանրապետականի անդամները, ուստի ենթակաների եւ նախարարի միջեւ որոշ տարաձայնություններ են առաջացել:
Մեզ պատմեցին անտառտնտեսություններից մեկի ղեկավարի հետ ծագած տարաձայնության մասին. անտառապետը բացահայտ քարոզչություն է արել ՀՀԿ-ի օգտին եւ արժանացել նախարարի հանդիմանությանը: Լուրը փորձեցինք ճշտել համակարգի աշխատողներից:
Իջեւանի անտառտնտեսության պետ, ՕԵԿ-ական Արծրունի Ղալթախչյանը մեզ հետ զրույցում ասաց. «Այսօր, ժամը 4-ին խորհրդակցություն է եղել, բայց ընտրությունների մասին խոսք անգամ չի եղել»: Իսկ Սեւքարի անտառտնտեսության պետ, ՀՀԿ-ական Աշոտ Երիցյանը նշեց. «Նախարարը ժողով է արել, բայց ոչ մի կուսակցական հորդոր չի արել: Անտառի պահպանության թեմայով էր, աշխատանքային էր»,- գրում է «Հրապարակը»: