ԵԱՀԿ-ն նախընտրական արշավի անմիջական դիտարկմամբ չի զբաղվում: Միաժամանակ մենք մեծ ջանքեր ենք ներդնում, որպեսզի ընտրական գործընթացն անհրաժեշտ` ժողովրդավարական հունով գնա: Այս մասին լրագրողների հետ զրույցում հայտարարեց ԵԱՀԿ երեւանյան գրասենյակի ղեկավար Անդրեյ Սորոկինը:
Հիշեցնենք, որ ԵՄ-ն, ԵԱՀԿ երեւանյան գրասենյակի միջոցով 1,7 մլն եվրոյի ծրագիր է իրականացնում` Հայաստանում միջազգային չափանիշներին համապատասխան ընտրությունների անցկացման համար:
Սորոկինը նշեց, որ իր ղեկավարած կառույցը հսկայական մջոցառումներ է իրականացնում բոլոր ուղղություններով: Այդ թվում` ստորագրվել է հուշագիր ԿԸՀ-ի հետ. «Ավելին, մենք աշխատում ենք ոչ միայն մայրաքաղաքում, այլ մյուս քաղաքներում: Մեր աշխատանքը բավականին մեծ է, այն տեսանելի է»,-նշեց Սորոկինը:
ԵԱՀԿ գրասենյակի ղեկավարը նաեւ հիշեցրեց, որ ընտրություններին ԵԱՀԿ մոտ 250 դիտորդներից բացի, կհետեւեն ԱՊՀ 151 դիտորոդներ, Եվրախորհրդարանի մոտ 70 ներկայացուցիչներ: Ընդհանուր առմամբ կլինեն մինչեւ 700 օտարերկրյա դիտորդներ, մոտ 14 հազար տեղական դիտորդներ:
«Մեծ քանակությամբ տարբեր միջոցառումների իրականացումը եւ ֆինանսական միջոցների ծախսումը վաղ թե ուշ որակ կտան, իսկ որակ մենք տեսնում ենք` դա ժողովրդավարական ազատ ընտրություններն են, որոնք պետք են ձեզ, պետք են մեզ եւ, առաջին հերթին, հայ ժողովրդին, ձեր երկրին»,-նշեց գրասենյակի ղեկավար: Նրա գնահատմամբ` նախորդ ընտրությունների համաեմատ կարելի է նկատելի առաջընթաց արձանագրել բոլոր ուղղություններով: «Դա ակնհայտ է»,-արձանագրեց Սորոկինը:
