Զինված իտալացին, ով մի քանի ժամ շարունակ Իտալիայի հյուսիսում գտնվող Բերգամո նահանգի Ռոմանո դի Լոմբարդիա քաղաքում գտնվող Equitalia հարկային գրասենյակում պատանդներ է պահել, բաց է թողել բոլոր պատանդներին եւ հանձնվել իշխանություններին: Տղամարդն այդ քայլին է դիմել իր աղքատ վիճակի պատճառով:
Տղամարդը զինված է եղել հրացանով եւ երկու ատրճանակներով: Նա պատանդ է վերցրել 15 մարդու, սակայն մեկ ժամ անց, երբ ոստիկանությունը շրջափակել էր շինությունը, բաց է թողել բոլորին, բացի մեկից, եւ համաձայնել է բանակցություններ վարել ոստիկանության հետ: Equitalia գրասենյակի աշխատակից Կարմինե Մորմանդին պատանդ է մնացել հինգ ժամ շարունակ:
Ազատվելուց հետո նրան շոկային վիճակում տեղափոխել են հիվանդանոց, գրում է Sky TG24-ը:
Բանակցությունների ընթացքում իտալացին հայտարարել է, որ ֆինանսական դժվարություններ ունի եւ պատրաստ է ինքնասպան լինել, գրում է «Ռոսբալտը»:
Ի վերջո, տղամարդը բաց է թողել վերջին պատանդին եւ հանձնվել ոստիկանությանը: Երբ նրան ձեռնաշղթաներով դուրս են բերել շենքից, նա բորբոքված վիճակում է եղել: Պարզվել է, որ նա 50-ին մոտ տարիքի առեւտրական է: Նրա կրակոցների արդյունքում պատանդներից ոչ ոք չի տուժել: