ԵՄ «Արեւելյան գործընկերություն» ծրագրի անդամ-երկրների, այդ թվում եւ Հայաստանի համար, վիզային ռեժիմի պարզեցումը ծրագրի մի մասն է կազմում եւ, բնականաբար, պետք է իրականություն դառնա։ Այս մասին դեկտեմբերի 11-ին հայտարարել է Հայաստանում ԵՄ նախագահող Շվեդիայի դեսպան Հանս Գուննար Ադենը։
Ծրագրի շրջանակներում վիզային ռեժիմի պարզեցումը, նրա խոսքով, նախաձեռնել է Շվեդիան։ Նա հիշեցրել է, որ վիզային ռեժիմը վերջերս վերացվել է Սերբիայի, Չերնոգորիայի եւ Մակեդոնիայի համար։
«Կարող եմ ասել, որ Հայաստանի համար ռիժիմը կպարզեցվի եւ մի օր էլ ընդհանրապես կվերանա»,- հայտարարել է Ադենը։ Բայց այդ գործընթացը, նրա խոսքով, ԵՄ առջեւ դրված հարցերից ամենավերջինների շարքում է։
Ծրագրի հիմնական խնդիրները անդամ-երկրների ժողովրդավարացման գործընթացն է, կապերի զարգացումն այդ երկրների միջեւ։
Ադենը նշել է նաեւ, որ Հայաստանի աշխարհաքաղաքական դիրքն այնպիսին է, որ «նրա հարեւաններն այնքան էլ չեն կիսում եվրոպական արժեքները»։ Նրա համոզմամբ, «Արեւելյան գործընկերությունը» կօգնի ոչ միայն Հայաստանին, այնպես էլ մյուս անդամ-երկրներին։
