ԼՂՀ Նախագահ Բակո Սահակյանի նախագահությամբ դեկտեմբերի 17-ին տեղի է ունեցել Անվտանգության խորհրդի նիստ, որի օրակարգում ընդգրկված է եղել H1N1 գրիպի հնարավոր համաճարակի դեմ ձեռնարկվելիք միջոցառումների մասին հարցը: NEWS.am գործակալությանը ԼՂՀ նախագահի աշխատակազմի մամուլի ծառայությունից տեղեկացնում են, որ ձեռնարկվող կանխարգելիչ միջոցառումների վերաբերյալ զեկույցով հանդես է եկել ԼՂՀ առողջապահության նախարար Արմեն Խաչատրյանը:
Երկրի ղեկավարն ընդգծել է, որ հանրապետությունում համաճարակի տարածման հավանականությունը ցածր է, սակայն անհրաժեշտ է անել հնարավոր ամեն բան՝ այն բացառելու ուղղությամբ: Որպես կանխարգելիչ միջոց որոշվել է սույն թվականի դեկտեմբերի 21-ից մեկ շաբաթով դադարեցնել բոլոր նախադպրոցական հիմնարկների եւ ուսումնական հաստատությունների աշխատանքը: