Վերջին օրերին հայ-ադրբեջանական սահմանում իրականացված դիվերսիոն գործողությունները Ադրբեջանի՝ ղարաբաղյան հակամարտության կարգավորման հարցում որդեգրած քաղաքականության դրսեւորումն էր: Այդ մասին, այսօր` հունիսի 8-ին, լրագրողների հետ հանդիպման ժամանակ ասաց ՀՀ պաշտպանության նախարարի խորհրդական, նախարարին առընթեր հասարակական խորհրդի նախագահ Գեղամ Հարությունյանը:
Մինչդեռ, ըստ Հարությունյանի, Ադրբեջանը որդեգրել է մաքսիմալիստական ծայրահեղ մոտեցում`բանակցային գործընթացում կիրառելով ուժի դիմելու սպառնալիք: «Ադրբեջանն իր ռազմատենչ հայտարարություններին լրջություն հաղորդելու համար սահմանում ստեղծում է լարվածություն: Դա քաղաքական նպատակ հետապնդող գործողություն է, շանտաժի քաղաքականություն: Դա շատ հանդուգն դեմարշ էր, նրանք ձգտում են ճնշում գործադրել, որ հունիսի 18-ին Փարիզում նախատեսված արտգործնախարարների եւ Մինսկի համանախագահ երկրների ներկայացուցիչների հետ հանդիպման ժամանակ ճնշում ապահովեն՝ խնդիրների քննարկումը իրենց համար նպաստավոր հունով տանելու համար»:
Հարությունյանը նշեց, որ եթե Ադրբեջանի ղեկավարությունը, սադրելով այս միջադեպը, հույս ուներ վախի, խուճապի, անհանգստության տրամադրություն հարուցել մեր հասարակության մեջ՝ հակառակ ազդեցությունը ստացվեց:
