ԱՄՆ Միջազգային զարգացման գործակալությունը մտադիր է երեք տարով միանվագ դրամաշնորհի պայմանագիր կնքել նախագծման եւ շինարարության աշխատանքների համար` Լեռնային Ղարաբաղում գյուղական բնակչության խմելու ջրի կարիքները բավարարելու նպատակով:
Այս մասին հայտարարություն է տեղադրվել ԱՄՆ կառավարության Ֆեդերալ բիզնես հնարավորությունների կայքում:
Պայմանագրի շրջանակներում պետք է վերականգնվեն ջրի մատակարարման համակարգերը եւ ենթակառուցվածքը եւ աշխատանք տարվի համայնքների հետ, որպեսզի ապահովվի ջրի մատակարարման համակարգերի հետագա պատշաճ շահագործումը: Աշխատանքների համար նախատեսվող ընդհանուր գումարը 3 միլիոն դոլար է: Նախատեսվում է սկսել ԼՂՀ Մարտունիի շրջանի 7 գյուղերից, որոնց բնակչությունը կազմում է մոտ 4200 մարդ:
Նախնական հայտարարության մեջ նշվում է, որ Լեռնային Ղարաբաղի ժողովրդին առակցության ֆինանսավորումը իրականացվում է ԱՄՆ ՄԶԳ Եվրասիայի տարածաշրջանային ծրագրի շրջանակում եւ իրականացվելու է ԱՄՆ ՄԶԳ Հայաստանի առաքելության միջոցով: