Լեռնային Ղարաբաղի կրթության եւ գիտության նախարար Վլադիկ Խաչատրյանը հրաման է ստորագրել դեկտեմբերի 21-ից 26-ը հանրակրթական, միջին մասնագիտական եւ բարձրագույն կրթական հաստատություններում, իսկ մինչդպրոցական հաստատություններում մինչեւ դեկտեմբերի 30-ը պարապմունքները դադարեցնելու մասին:
ԼՂՀ առողջապահության նախարար Արմեն Խաչատրյանը հստակեցրել է, որ նման որոշումն ընդունվել է կանխարգելիչ նկատառումներով՝ հաշվի առնելով Հայաստանում խոզագրիպով հիվանդների աճը եւ սեզոնային գրիպի բռնկումը ԼՂՀ-ում: Նրա խոսքով, այս տարվա նոյեմբեր-դեկտեմբեր ամիսներին, նախորդ երկու տարիների նույն ժամանակահատվածի համեմատությամբ, ԼՂՀ-ում վերին շրչուղիների հիվանդություններով վարակվածների թիվն աճել է 4 անգամ:
Նման իրավիճակ եղել է 2007թ., երբ կրկին ստիպված էին ժամանակավորապես դադարեցնել դպրոցական դասերը:
Միեւնույն ժամանակ նախարարն ընդգծեց, որ այսօր ԼՂՀ-ում չկա «խոզի գրիպի» պաշտոնապես հաստատված որեւէ դեպք: Իրավիճակը վերահսկվում է: