Ռուս հեռուստահաղորդավար Քսենյա Սոբչակը պատմել է, թե ինչպես են խուզարկել իր տունը: Նրանից բռնագրավել են բոլոր իրերը, որոնք կապ են ունեցել տեխնիկայի հետ, նաեւ` տնային հեռախոսը:
«Ինչ-որ վահանակներ, հին հեռախոսներ, ամբողջ ռադիոկապը: Երեւի նրանք կարծում են, որ ես ռադիստկա Քեթն եմ», - «Էխո Մոսկվի» ռադիոկայանին է պատմել Սոբչակը հունիսի 12-ին քննչական հանձնաժողովի հարցաքննությունից հետո, որը տեւել էր մի քանի ժամ:
Հաղորդավարուհուն 56 հարց են տվել, որոնք հիմնականում վերաբերել են խուզարկության ժամանակ նրա տանը հայտնաբերված փողերին եւ մայիսի 6-ի Բոլոտնայա հրապարակի անկարգություններին: Նա օգտվել է Սահմանադրության 51-րդ հոդվածից, որը թույլ է տալիս քաղաքացիներին վկայություն չտալ իրենք իրենց եւ իրենց հարազատների դեմ, եւ հրաժարվել է պատասխանել:
Սոբչակը խուզարկությունը գնահատել է որպես հաշվեհարդար, եւ վստահ է, որ իր հեռախոսը գաղտնալսվել է. քանի որ նման խոշոր գումար նա ամեն օր չի պահում իր գաղտնարանում:
Խուզարկության ընթացքում հեռուստահաղորդավարուհուն զարմացրել է իրավապահ մարմինների տարբեր պահվածքը: «Կային հաճելի տղաներ, կար մեկ նորմալ, մարդկային քննիչ: Եւ կար միանգամայն մի այլ մարդ, ով հաճույք էր ստանում իր ցանկացած արգելքից, նրանից, որ տղամարդկանց ստիպում էր ինձ հետ զուգարան գալ: Այսինքն ես դա պետք է անեի ինքնաձիգով եւ դիմակով տղամարդու ներկայությամբ»:
Իր մոտ հայտնաբերված խոշոր գումարը նա շատ պարզ է բացատրել. «Ես լավ եմ վաստակում: Ես չունեմ «Գազպրոմի» բաժնետոմսեր, ես քրտինքով եմ գումար վաստակում: Իսկ թե որտեղ պահել գումարը` ծրարներում, բանկաներում, դա իմ անձնական գործն է»: