Հայաստանն ընտրել է զարգացման ճիշտ ճանապարհ, հնարավոր է դանդաղ տեմպերով, սակայն հանրապետությունը շարժվում է ճիշտ ճանապարհով: Մամուլի ասուլիսում նման կարծիք է հայտնել «Բարգավաճ Հայաստան» կուսակցության պատգամավոր, եվրաինտեգրման խորհրդարանական հանձնաժողովի նախագահ Նաիրա Զոհրաբյանը՝ ամփոփելով տարվա արդյունքները:
Անցնող տարվա ամենամեծ ձեռքբերումը Զոհրաբյանը համարում է կայունությունը, որը, պատգամավորի կարծիքով, կշարունակվի նաեւ 2010թ.-ին: Ամենանշանալի իրադարձությունները, նրա կարծիքով, տեղի են ուենցել արտաքին քաղաքականության ոլորտում, հայ-թուրքական արձանագրություններն ու Լեռնային Ղարաբաղի գործընթացի ակտիվացումը: «Ես կարծում եմ՝ այդ գործընթացները հայկական կողմի համար բարենպաստ զարգացում են ունենալու»,- նկատեց Զոհրաբյանը:
Խոսելով ներքաղաքական իրողություններից, Զոհրաբյանը նկատեց, որ 2008թ. մարտի 1-ի իրադարձությունները լավ դաս դարձան ինչպես իշխանությունների, այնպես էլ ընդդիմության համար՝ համոզմունք հայտնելով, որ Հայաստանում նման բան էլ չի կրկնվի: «Չկա այնպիսի հարց, որը երկխոսության միջոցով քաղաքակիրթ լուծման հնարավորություն չունենա»,- ընդգծեց նա:
Խոսելով ԲՀԿ առաջնորդ, Հայաստանի օլիմպիական կոմիտեի նախագահ Գագիկ Ծառուկյանի եւ Հանրապետական կուսակցության ներկայացուցիչ, ֆուտբոլի ֆեդերացիայի նախագա Ռուբեն Հայրապետյանի լարված հարաբերություններից, Նաիրա Զոհրաբյանը ընդգծեց, որ Հայրապետյանի ներողությունը լիուլի բավարարել է Գագիկ Ծառուկյանին:
Զոհրաբյանը նաեւ նկատել է, որ պետք չէ քաղաքական հարթության մեջ դիտարկել ԵԽԽՎ Մոնիտորինգային հանձնաժողովի վերջին նիստում Հայաստանի հարցով համազեկուցողներ Ջոն Պրեսկոտի եւ Ժորժ Կոլոմբիեի բացակայությունը: «Այստեղ քաղաքական որեւէ ենթատեքստ չկա, ուղղակի մարդիկ զբաղված էին եւ չեն կարողացել մասնակցել հանձնաժողովի նիստին»,- նշեց Զոհրաբյանը՝ հերքելով, թե Հայաստանի հարցն արտահերթ կարգով մտնելու է ԵԽԽՎ հունվարյան նստաշրջան: