Ֆրանսիայի նախկին նախագահ Նիկոլա Սարկոզիին մեղադրանք են ներկայացրել հետաքննության գաղտնիքը հրապարակելու եւ հետաքննության ընթացքին խառնվելու համար: Հայցեր են ներկայացվել նաեւ Սարկոզիի համախոհների` հանրային կապերով նրա խորհրդական Ֆրանկ Լուվրիեի եւ ՆԳՆ-ի նախկին ղեկավար Բրիս Օրթֆեի դեմ:
Ինչպես ֆրանսիական լրատվամիջոցներին վկայակոչելով հայտնում է «lenta.ru»-ն, դատական հայցերը ներկայացվել են հունիսի 18-ին` 2002 թվականին Կարաչիի ահաբեկչության ժամանակ զոհված ֆրանսիացի մասնագետների հարազատների փաստաբանների կողմից: Մեղադրանք ներկայացնելու պատճառ է հանդիսացել Ելիսեյան պալատի մամլո ծառայության պաշտոնական հաղորդագրությունը, որը հրապարակվել էր 2011 թվականի սեպտեմբերի 22-ին: Այնտեղ ասվում էր, որ Նիկոլա Սարկոզիի անունը «ոչ մի կերպ չի շոշափվում» ահաբեկչության մասին գործում:
Ըստ մեղադրող կողմի` հաղորդագրության հրապարակումը հետաքննության ընթացքին բացահայտ միջամտելու արդյունքն է, քանի որ երկրի քաղաքական ղեկավարությունը չպետք է իրազեկված լինի գործի կոնկրետ նյութերին, որի հետաքննությամբ զբաղվում են անկախ դատավորները:
«Կարաչիգեյթ» անվանումն ստացած աղմուկի հետաքննությունը Ֆրանսիայում տարվում է ավելի քան 10 տարի: Սկանդալի կենտրոնում 1990-ականներին Ֆրանսիայի կողմից Պակիստանին սուզանավեր վաճառտելու հարցն է:
Ըստ հետաքննության տվյալների` գործարքն ուղեկցվել է պակիստանյան միջնորդի վճարումներով: 2002 թվականի ահաբեկչությունը, որի ժամանակ զոհվել են սուզանավերի շինարարության վրա աշխատող ֆրանսիացի 11 ինժեներներ, ըստ վարկածներից մեկի, դարձել է նախագահ Ժակ Շիրակի` վճարումների դադարեցման վրեժը: