Վերլուծաբան Ջոշուա Կուչերան իր բլոգում բավական օրիգինալ է արձագանել սեփական սպառազինությունների արտադրանքն ավելացնելու Բաքվի ձգտմանը:

NEWS.am-ը ներկայացնում է The Bug Pit հեղինակ Ջոշուա Կուչերայի հոդվածը Eurasianet.org կայքում.
Ադրբեջանն արտադրում է իր զրահատեխնիկան, որը «100 տոկոսով լինելու է հայրենական արտադրության», հաղորդում է APA գործակալությունը: Հաղորդագրության մեջ քիչ տեղեկություններ կան զրահատեխնիկայի մասին, չկա անգամ անվանումը, միայն այն, որ առաջին անգամ հետախուզական եւ «մարտական» մոդելներ են արտադրվելու:

Սակայն այն կովկասյան գերազանցության զվարճալի մասնիկներ է պարունակում. «Այդ մեքենաները գերազանցություն են ունենալու վրացական տրանսպորտային «Դիդգորի» եւ հայկական «Հայկ» միջոցների նկատմամբ` մանեւրելու, բալիստիկ պաշտպանության, կայունության եւ այլ բնորոշիչների առումով»:

Ադրբեջանն արդեն զրահատեխնիկա է արտադրում հարավաֆրիկյան ընկերության հետ համագործակցելով: Եւ ինչպես պարզվեց Վրաստանի անօդաչու ինքնաթիռի դեպքում, հեշտ է ասել, որ ինչ-որ բան «100 տոկոսով տեղական արտադրության է»` առանձնապես դա նկատի չունենալով: Դա ավելի շուտ ազգային հպարտության, քան այլ հարց է: