Վրաստանի Քութայիսիի շրջանի մոր եւ մանկան կենտրոնում խոզի գրիպից դեկտեմբերի 22-ին մահացել է 18-ամյա հղի մի կին: Ինչպես հաղորդում է «Գրուզիա Online»-ը՝ վկայակոչելով հիվանդությունների վերահսկողության Վրաստանի ազգային կենտրոնին, Սոպո Իոսելիանին մահացել է հենց խոզի գրիպի վիրուսի զարգացման արդյունքում: Կինը, ով գտնվում էր հղիության 24 շաբաթվա շրջանում, հիվանդանոց էր տեղափոխվել ընդամենը 5 օր առաջ եւ մահացել է երկկողմանի թոքաբորբից:
Ներկա դրությամբ, Կենտրոնի տվյալներով, ծանր վիճակում է գտնվում եւս մեկ կին՝Զուգդիդիի հիվանդանոցում: Զուգդիդիից Թբիլիսի է տեղափոխվել մի տղամարդ, ով նույնպես ծայրահեղ ծանր վիճակում է:
Սա Վրաստանում խոզի գրիպից մահվան 7-րդ դեպքն է: Բժիշկները հայտարարում են, որ բոլոր դեպքերում մահվան պատճառը բժշկի ուշ դիմելն է եղել:
