Ավստրիան շահագրգռված է Հայաստանի հետ մշակութային հարաբերությունների զարգացմամբ: Այդ մասին Երեւանում հայտարարել է Ավստրիայի նախագահ Հայնց Ֆիշերն, այսօր` հունիսի 26-ին, Հայաստանի նախագահ Սերժ Սարգսյանի հետ համատեղ ասուլիսում: Նշենք, որ սա Ավստրիայի նախագահի առաջին պաշտոնական այցն է Հայաստան:
Շնորհակալություն հայտնելով ջերմ ընդունելության համար, նա նկատել է, որ բավարարված է համագործակցության առկա մակարդակով եւ հավելել է, թե հետաքրքրող հարցերի շրջանակ քննարկվել են երեկ եւ այսօր, նախատեսված են այլ հանդիպումներ:
«Մենք ցանկանում ենք տարբեր ոլորտներում ավելի շատ մերձեցում եւ համագործակցություն փոխհամաձայնության ոգով»,- նկատել է Ֆիշերը` հույս հայտնելով, որ հայ-ավստրիական բիզնես-համաժողովը հաջող կընթանա:
Խոսելով Հայաստանի երեքհազարամյա պատմության մասին` Ավստրիայի նախագահն ընդգծել է, թե իր երկիրը շահագրգիռ է մշակութային կապերի զարգացման գործում: «Հայաստանն առաջին քրիստոնեական պետությունն է, որ նպաստել է քրիստոնեության տարածմանը»,- ասել է Ֆիշերը` հավելելով, որ այցի շրջանակներում նախատեսված է հանդիպում Ամենայն հայոց կաթողիկոսի հետ:
Լուսանկարը` Սոնա Բարսեղյանի
