Բրիտանական հակահետախուզության MI-5-ի գլխավոր տնօրեն Ջոնաթան Էվանսը սենսացիոն հայտարարությամբ է հանդես եկել. «Արաբական գարունը» Միացյալ Թագավորությունում ահաբեկչական սպառնալիքի աճի պատճառ դարձավ:
Արեւմտյան երկրները ողջունում էին Հյուսիսային Աֆրիկայի եւ Մերձավոր Արեւելքի երկրների դեպքերը` հայտարարելով, որ դրանք տարածաշրջանում կամրապնդեն ժողովրդավարությունը, նշում է «Ռոսիսկայա գազետան»:
Սակայն, ըստ Էվանսի, արաբական աշխարհի երկրներում անկայուն իրավիճակը «բարենպաստ միջավայր» ստեղծեց «Ալ Կաիդայի» համար: Նրա խոսքով` պոտենցիալ ահաբեկիչներն ուղեւորվում են այդ երկրներ` ապստամբ գործունեության փորձ ստանալու համար:
«Նրանցից ոմանք վերադառնում են Բրիտանիա եւ տեղում սպառնալիք ստեղծում: Դեպքերի նման զարգացումը մեզ համար նոր եւ տագնապալի է: Եւ իրավիճակը կարող է վատթարանալ», - նշել է Էվանսը, որը վերջին երկու տարիներին առաջին անգամ հանդես է եկել հանրության առջեւ:
Նրա տվյալներով` այժմ «Ալ Կաիդայի» ազդեցությունը Աֆղանստանից եւ Պակիստանից տեղափոխվում է Եմեն, Սոմալի եւ Հյուսիսային Աֆրիկայի երկրներ:
Բրիտանական հետախուզության պետը նաեւ հայտարարել է, որ համացանցում նպատակամղված կերպով աճում է հաքերային հարձակումների հաճախականությունը, ինչն սպառնում է Բրիտանիայի տեղեկատվական անվտանգությանը:
