Սիրիան կզգա Թուրքիայի զայրույթը: Այս մասին, այսօր` հունիսի 26-ին, հայտարարել է Թուրքիայի վարչապետ Ռեջեփ Թայիփ Էրդողանը, Դամասկոսի հասցեին հանդես գալով սպառնալիքներով եւ մեղադրանքներով:
Ինչպես հաղորդում է NEWSru.com-ը, թուրք գործիչն իր ելույթում հայտարարել է, որ Սիրիայում իշխում է բռնի իշխանությունը, ով սպանում է սեփական ժողովրդին` երեխաների, ծերերի ու կանանց:
«Թող յուրաքանչյուրն իմանա, որ Թուրքիան որքան ուժեղ է ընկերության մեջ, այնքան էլ խիստ է զայրույթի մեջ: Թող մեր սառնասրտությունը չխաբի որոշ մարդկանց», - ասել է Էրդողանն՝ ընդգծելով, որ թուրքական օդուժի ինքնաթիռը իբր թե խփվել է ոչ թե ողբերգական սխալի հետեւանքով, այլ կանխամտածված:
Ռեջեփ Թայիփ Էրդողանը սիրիական հակաօդային պաշտպանության ուժերի գործողությունն անվանել է «թշնամական ակտ»:
«Այսօրվանից սիրիական կողմից ամեն մի սադրանք կդիտարկվի որպես ռազմական վտանգ, թուրք զինվորները կպատասխանեն դրանց», - Էրդողանին է մեջբերել «Ազատություն» ռադիոկայանը: Նա նաեւ մեկնաբանել է ռուսական կողմի հայտարարությունը Սիրիայի հարցով, նշելով, որ թուրքական կողմի տվյալներով, ՌԴ ԱԳ նախարար Լավրովի «լավագույն ցանկությունները չեն հաստատվում»:
Բացի այդ, Թուրքիայի վարչապետը գոհունակություն է հայտնել սիրիական հակաօդային պաշտպանության կողմից թուրքական F-4 Phantom ինքնաթիռի հետ կապված պատահարի վերաբերյալ ՆԱՏՕ-ի դիրքորոշմամբ: