Հայ-ադրբեջանական սահմանագոտու հյուսիսարեւելյան հատվածում` Տավուշի մարզի Բերքաբեր բնակավայրի մերձակայքում, հունիսի 28-ին, ԵԱՀԿ գործող նախագահի անձնական ներկայացուցչի գրասենյակի կողմից անցկացվել է հայ-ադրբեջանական սահմանագծի հերթական դիտարկումը:
Հայկական կողմից դիտարկմանը մասնակցել են ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշիկի դաշտային օգնականներ Խրիստո Խրիստովը եւ Անտալ Խերդիչը:
Մինչ դիտարկման վայր մեկնելը Տավուշի մարզպետարանում ԵԱՀԿ ներկայացուցիչներին ներկայացվել են հայ-ադրբեջանական պետական սահմանում տիրող իրավիճակը, հունիսին ադրբեջանական զինուժի կողմից հրադադարի ռեժիմի խախտման դեպքերի վիճակագրությունը, ինչպես նաեւ ադրբեջանական դիպուկահարների գործողություններին ու սադրանքներին վերաբերող փաստեր:
Այնուհետեւ հայկական կողմի եւ ԵԱՀԿ-ի ներկայացուցիչները մեկնել են դիտարկման տեղանք եւ ռադիոկապ հաստատել ադրբեջանական կողմի հետ` միմյանց տալով անվտանգության երաշխիքներ: Դիտարկումն անցկացվել է որոշակի հեռավորության վրա` ռադիոկապի միջոցով: Ադրբեջանական կողմը կրկին հրաժարվել է սահմանը հատելու եւ անմիջական դիտարկում անցկացնելու հայկական կողմի առաջարկից:
Դիտարկումն անցել է առանց միջադեպերի: