Հայաստանի էկոնոմիկայի նախարարության զբոսաշրջության եւ տնտեսական զարգացման վարչության պետ Մեխակ Ապրեսյանը հույս ունի, որ ԱԺ պատգամավոր Ռուբեն Հայրապետյանին պատկանող «Հարսնաքար» ռեստորանում ռազմական բժիշկների ծեծի ենթարկելու դեպքը, որի հետեւանքով մահացել է բժիշկներից Վահե Ավետյանը մեր երկրի իմիջի վրա էապես չի ազդի: Այս մասին, այսօր` հուլիսի 4-ին, լրագրողների հետ զրույցում ինքը` Մեխակ Ապրեսյանը:
Նա նշեց, որ ընդհանրապես միջազգային պրակտիկան ցույց է տալիս, որ զբոսաշրջությունը զգայուն է բոլոր տեսակի երեւույթների նկատմամբ` դա կլինի անկայուն վիճակ տարածաշրջանում, պատերազմ, հիվանդություն, որեւէ շարունակական բնույթ կրող միջադեպեր: «Հուսով եմ, որ այս միջադեպն ազդեցություն չի ունենա, ցանկացած երկրում էլ կարող է լինել: Եթե դրանք կրկնվող չեն, հուսով եմ, որ մեր իմիջի վրա էապես չի ազդի»,- ասաց Մեխակ Ապրեսյանը:
Ավելի վաղ NEWS.am-ը հայտնել էր, որ հունիսի 17-ին, ժամը 23-ի սահմաններում ՀՀԿ-ական պատգամավոր, ՀՖՖ նախագահ Ռուբեն Հայրապետյանին (Նեմեց Ռուբո) պատկանող «Հարսնաքար» ռեստորանում դաժան ծեծի էին ենթարկվել մի քանի ռազմական բժիշկներ: Նրանցից ՊՆ կենտրոնական կայազորի ռազմական հոսպիտալի ԼՈՌ բաժանմունքի պետ, բուժծառայության մայոր Վահե Ավետյանը հունիսի 29-ին հիվանդանոցում մահացել էր: Հարուցված քրգործի շրջանակներում կալանավորվել է 6 մարդ, որոնց մեջ կան նաեւ Ռուբեն Հայրապետյանի թիկնազորի անդամներ:
Հիշեցնենք, որ Կովկասում խոշորագույն առցանց տուրիստական գործակալությունը՝ Ginosi.com-ը, ժամանակավորապես դադարեցրել է համագործակցությունը «Հարսնաքար» ռեստորանի հետ՝ կապված այդ ռեստորանում զինվորական բժիշկ Վահե Ավետյանի դաժան ծեծի հետ, որի հետեւանքով վերջինս մահացել է:
