Նախկին պատգամավոր, «Ժառանգություն» ընդդիմադիր խմբակցության անդամ Ստեփան Սաֆարյանը պատճառներ չի տեսնում չհավատալ «Բարգավաճ Հայաստան» կուսակցության հայտարարությանը, թե «Հարսնաքարի» հարցով արտահերթ նիստ գումարելու նախաձեռնությանը քիչ անդամների միանալը պայմանավորված է տեխնիկական պատճառներով: Այդ մասին նա հայտարարել է NEWS.am-ի թղթակցի հետ զրույցում:
«Եթե քվեարկությունը կայանար արձակուրդների փուլից առաջ, տեսականորեն, ցանկության դեպքում այդ հայտարարությունը կարելի կլիներ կասկածի տակ դնել: Սակայն ես հիմքեր չունեմ կասկածելու, որ տվյալ պարզաբանումը համապատասխանում է իրականությանը»,- նկատել է Սաֆարյանը:
Ինչ վերաբերում է ԲՀԿ-ական պատգամավոր Էլինար Վարդանյանի հայտարարությանը, թե «Ժառանգության» հետ համագործակցությունը այս կամ այն նախաձեռնության շրջանակներում «բացասական է դիտարկվում», Սաֆարյանը նշել է, թե դա ելք չէ: «Եթե կան խնդիրներ, որոնք հուզում են ժողովրդին, խնդիրներ, որոնց բախվում է երկիրը, ապա դրանք պետք է լուծել անկախ իրար նկատմամբ վերաբերմունքից»,- ասել է նա:
Ինչպես արդեն նշել է NEWS.am-ը, արտահերթէ նիստ հումարելու նախաձեռնությանը ԲՀԿ-ից միացել էր ընդամենը 7 պատգամավոր: «Բարգավաճ Հայաստանի» մամուլի քարտուղար, պատգամավոր Տիգրան Ուրիխանյանը` մեկնաբանելով փաստը, նշել էր, թե խմբակցության բազմաթիվ անդամներ բացակայել են երկրից տարբեր պատճառներով եւ ֆիզիկապես հնարավորություն չեն ունեցել մասնակցել ստորագրահավաքին:
