Բուլղարիայում իսրայելցի զբոսաշրջիկներով ավտոբուսը պայթեցրած մահապարտը եկել է Ռումինիայից, սահուն խոսել է ռուսերենով և ճանապարհորդել մի կնոջ ուղեկցությամբ, հայտնում է Agence France-Presse հղում անելով տեղական հեռուստատեսությանը, հայտնում է Lenta.ru.-ն:
Քննության տվյալների համաձայն, մինչև ահաբեկչական գործողությունը, հանցագործը Բուրգասում չի ապրել, այլ Վառնայում, ուր եկել է հարևան Ռումինիայից: Այնտեղ նա հանգրվանել է Hotel Perfekt հյուրանոցում, որտեղ տեղավորվել է իր ուղեկցուհու հետ, ով, ինչպես կասկածում են քննիչները, կարող էր ճանաչել ահաբեկչի ենթադրյալ մեղսակցին:
Բացի այդ, ոստիկանները գտել են այն տաքսու վարորդին, որը տեղափոխել էր մադասպանին ահաբեկչությունից մեկ օր առաջ: Տաքսու վարորդը պատմել է, որ իր հաճախորդը վատ չէր խոսում ռուսերեն:
Այդ տվյալների պաշտոնական հաստատում առայժմ չկա: Իշխանությունները հայտարարում են ընդամենը, որ ահաբեկիչը միջին տարիքի տղամարդ է եղել, Բուլղարիայի քաղաքացի չի եղել և այդ երկրում գտնվել է 4 օրից ոչ շատ:
Ինչպես հայտնվել էր, Բուրգասում ահաբեկչական գործողությունը տեղի էր ունեցել հուլիսի 18-ին: Իսրայելցի զբոսաշրջիկներով ավտոբուսի պայթյունի հետևանքով մահացել են 5 իսրայելցիներ, բուլղարացի վարորդը և ինքը` ահաբեկիչը: Մոտ 30 հոգի վիրավորվել էր:
