Թուրքիայի Իգդիր քաղաքում երկօրյա հացադուլ է հայտարարվել` ի նշան բողոքի, Իգդիրի քաղաքապետ Մեհմեդ Նուրի Գյունեշի եւ եւս յոթ «Խաղաղություն եւ ժողովրդավարություն» կուսակցության անդամների ձերբակալության:

Թուրքական Haberaktuel կայքէջի փոխանցմամբ` հացադուլի հետ կապված հայտարարությամբ է հանդես եկել 2009-ի դեկտեմբերի 11-ին Թուրքիայի ՍԴ-ի որոշմամբ փակված «Ժողովրդավարական հասարակություն» կուսակցության Իգդիրի նահանգային կառույցի նախկին ղեկավար Սուլեյման Քալքանը: Վերջինս մտահոգություն է հայտնել, որ թուրքական կառավարության խոսնակը հայտարարում է, որ ընտրություններում քրդերը Իգդիրն էլ վերցրեցին եւ հաստատվեցին Հայաստանի հետ սահմանին:

Քալքանը նշել է, որ իշխանությունները Իգդիրի ընտրված քուրդ քաղաքապետին եւ իր կուսակիցներին ռազմական հեղաշրջման նման շատ արագ ձերբակալեցին եւ բանտերը լցրեցին: Բանախոսը զգուշացրել է իշխող «Արդարություն եւ զարգացում» կուսակցությանը, որ քրդերը չեն հանդուրժելու իրենց դեմ իրականացվող ահաբեկչությունն ու ճնշումները: «Այս պահին հազարավոր քուրդ երեխաներ կան բանտերում: Մենք մեր բողոքն ենք հայտնում Էրդողանի կուսակցության կողմից քրդերի դեմ իրականացվող ցեղասպանության քաղաքականության դեմ»-նշել է Սուլեյման Քալքանը:

NEWS.am-ը հիշեցնում է, որ հունվարի 21-ի առավոտյան ժանդարմերիայի ներկայացուցիչները Իգդիրի քաղաքապետի եւ կուսակիցների («Խաղաղություն եւ ժողովրդավարություն» կուսակցություն) եւս 10 անդամի տանը խուզարկություն են իրականացրել եւ իրենց հետ տարել նաեւ Իգդիրի քաղաքապետին, որին այնուհետ իր 7 կուսակիցների հետ ձերբակալել են PKK-ի հետ կապ ունենալու մեղադրանքով: Այս ձերբակալությունը լուրջ լարվածություն առաջացրեց Իգդիրում: Տեղի ունեցան բախումներ Իգդիրի քրդերի եւ ադրբեջանցիների միջեւ:

Ի դեպ, Իգդիրի ներկայիս ձերբակալված քաղաքապետ Մեհմեդ Նուրի Գյունեշը ընտրվել է 2009 թվականի մարտի 29-ի տեղական ինքնակառավարման մարմինների ընտրությունների արդյունքով։ Վերջինս Թուրքիայի Հանրապետության ստեղծումից ի վեր Իգդիրի առաջին քուրդ քաղաքապետն է։ Մինչ այդ տարիներ ի վեր Իգդիրում ադրբեջանական բնակչության գերակշիռ մեծամասնության պատճառով՝ քաղաքապետեր են ընտրվել ադրբեջանցիներ։

Իգդիրի բնակչությունը երկփեղկված է հավասար երկու մասի։ Իգդիրի ադրբեջանցիները դեմ են առանց Ղարաբաղի խնդրի լուծման հայ-թուրքական սահմանի բացմանը, իսկ քրդերը՝ պնդում են, որ առանց նախապայմանների պետք է բացվեն սահմանները։