Հայաստանի հակաօդային պաշտպանության (ՀՕՊ) համակարգը կապահովի Երեւանից Ստեփանակերտ թռչող քաղաքացիական օդանավերի անվտանգությունը: Այս մասին այսօր՝ հունվարի 18-ին, մամուլի ասուլիսում նշեց Հայաստանի պաշտպանության նախարար Սեյրան Օհանյանը:
Անդրադառնալով Բաքվի սպառնալիքներին, թե կհարվածի այդ օդանավերին, Օհանյանն ընդգծեց, որ ՀՀ ռազմաօդային ուժերը դա թույլ չեն տա:
Ինչ վերաբերում է ռազմական գործողությունների վերսկսման հնարավորությանը, ՊՆ ղեկավարը նշեց, որ նման վտանգը պահպանվում է, սակայն իրավիճակի վերլուծությունը ցույց է տալիս, որ ներկայումս նոր պատերազմի հավանականությունն այնքան էլ բարձր չէ:
Ստեփանակերտի օդանավակայանի աշխատանքները վերսկսելու հեռանկարը հիստերիկ արձագանք է գտնում Ադրբեջանում: Այնտեղից պարբերաբար սպառնալիքներ են հնչում, թե «կհարվածեն» կամ «հարկադրաբար վայրէջքի կտանեն» Ստեփանակերտ թռչող օդանավերը: Նման սպառնալիքներն ուղղակի հակասում են քաղաքացիական ավիացիայի միջազգային նորմերին:
