Հայաստանի սփյուռքի նախարարության նախաձեռնությամբ Գ.Սունդուկյանի անվան ազգային ակադեմիական թատրոնում, այսօր՝ ապրիլի 22-ին, կայացել է մեծանուն գրող, դրամատուրգ, հրապարակախոս Պերճ Զեյթունցյանի մեծարման երեկոն, որին մասնակցել են պաշտոնատար անձինք, մշակութային գործիչներ, մտավորականներ:
Սփյուռքի նախարարի պաշտոնակատար տիկին Հրանուշ Հակոբյանն իր խոսքում, մասնավորապես, նշել է. «Դուք Ձեր ստեղծագործությամբ եւ նկարագրով դարձել եք մի կենդանի ջահ, որ լուսավորում ու իր հետեւից տանում է գրականության ճամփան բռնած նոր սերունդներին: Անգերազանցելի է Ձեր հրապարակախոսության դերը նոր սերունդների ազգային դիմագծի ձեւավորման գործում: Ընդամենը մեկ օրից հայոց ցեղասպանության 99-րդ տարելիցն է: Այս երեկոն խորհրդանշական է նրանով, որ շուրջ կես դար Ձեր ստեղծագործություններով թույլ չեք տվել, որ «ժանգոտվի մարդկության հիշողությունը»:
Հրանուշ Հակոբյանը մեծ գրողին պարգեւատրել է ՀՀ Սփյուռքի նախարարության հուշամեդալով:
Մեծարման երեկոյի ընթացքում ներկայացվել է Պերճ Զեյթունցյանի անցած ստեղծագործական ուղին, տեսաշարով ցուցադրվել են հատվածներ, գրողի հարցազրույցներից, ինչպես նաեւ Արմեն Ջիգարխանյանի, Լեւոն Անանյանի, Արմեն Խանդիկյանի, գրողի դստեր` Զարմինե Զեյթունցյանի գնահատանքի խոսքերը:
Ներկայացվել է մի դրվագ Պերճ Զեյթունցյանի «Ոտքի դատարանն է գալիս» դրամայից (բեմադրիչ Տիգրան Գասպարյան, Սողոմոն Թեյլերյանի դերում` Տիգրան Ներսիսյան):
Իրենց կատարումներով Պերճ Զեյթունցյանին հարգանքի տուրք են մատուցել Կոմիտասի անվան պետական քառյակը, Արարատյան հայրապետական թեմի «Ծաղկազարդե, ինչպես նաեւ ՀՀ պաշտպանության նախարարության «Զորական» համույթները:
