Թուրքիայի մարդու իրավունքների ասոցիացիան Հայոց ցեղասպանության 99-րդ տարելիցի կապակցությամբ հանդես է եկել հայտարարությամբ՝ երկրի կառավարությանը կոչ անելով ճանաչել մարդկության դեմ հանցագործությունը եւ վերջ դնել ժխտմանը, հայտնում է «Asbarez»-ը:
Հայտարարության հեղինակները հիշեցնում են, որ Առաջին աշխարհամարտի նախաշեմին Օսմանյան կայսրությունում շուրջ 2 մլն հայ էր բնակվում, սակայն Ցեղասպանությունը եւ Թուրքիայի կառավարության քաղաքականությունը հանգեցրին նրան, որ այդ համայնքն այլեւս գոյություն չունի: Այսօր Թուրքիայում ընդամենը 60 հազար հայ է բնակվում:
Հայտարարությունում նշվում է, որ Ցեղասպանությունը ոչ միայն գազանություններ եւ զանգվածային սպանություններ էր, այլեւ հսկայական թալան, քանի որ զոհերի ունեցվածքն առգրավվել էր: Եվ այս անսահման թալանը ժխտողական քաղաքականության հիմնական պատճառն է:
«Ժխտումը մարդու իրավունքների առավել լիարժեք, առավել արդյունավետ եւ ամենատարածված խախտումն է, որովհետեւ դառնում է մարդու իրավունքների հետագա խախտումների աղբուր, ավելին՝ խթան»,- ասված է հայտարարությունում:
