Հայաստանի բնապահպանության նախարարությունը թաքցնում է Սեւանա լճում սաղմոնազգիների բազմացման ճգնաժամի վերաբերյալ տվյալները, հուլիսի 21-ին լրագրողներին հայտնել է «Էկոլուր» ՀԿ-ի նախագահ Ինգա Զարաֆյանը: Ըստ նրա` մի քանի ամիս առաջ ՀՀ բնապահպանության նախարարության «Շրջակա միջավայրի վրա ներգործության մոնիտորինգի կենտրոնը» ներկայացրել է Սեւանա լճում ջրի վիճակի վերաբերյալ տվյալներ: «Նրանց կայքում հաղորդագրություն կար, որ լճի ջրի 60%-ը անպիտան է սաղմոնազգիների համար` ճահճացան պատճառով: Սակայն երբ մենք ապրիլին մեջբերեցինք այդ տվյալները, Կենտրոնն անմիջապես հեռացրեց դրանք կայքից», - ասել է Զարաֆյանը:
Բնապահպան ակտիվիստ Արթուր Գրիգորյանի խոսքով՝ անհասկանալի է՝ ուր են անհետացել Սեւանի ափամերձ գոտին բուսականությունից մաքրելու համար հատկացված փողերը:
Նա նշել է, որ ջրի մակարդակի վերականգնմանը զուգահեռ առափնյա ծառերն ու թփերը ջրի տակ են անցնում, ինչն էլ այն ձկան համար անպետք է դարձնում: «Իսկ փողերը հատկացվում են եւ բյուջեից, եւ միջազգային կազմակերպությունների կողմից: Այս խախտումների համար պատասխանատու են բնապահպանության նախկին նախարար Արամ Հարությունյանը եւ բնապահպանության նախարարության «Բնապահպանական ծրագրերի իրականացման գրասենյակի» տնօրեն Վիկտոր Մարտիրոսյանը», - հավելել է Գրիգորյանը:
