Աշխատանքային հերթական խորհրդակցության ժամանակ Երեւանի քաղաքապետ Տարոն Մարգարյանին զեկուցվել է, որ մայրաքաղաքի վարչական շրջաններում տաքսիների նոր կայանատեղիներ կամակերպելու նպատակով ՃՈ եւ շահագրգիռ կազմակերպությունների հետ համատեղ համապատասխան աշխատանքներ են տարվել: Մասնավորապես, նշվել է, որ առաջարկվող 25 նոր ճանապարհահատվածների վերաբերյալ ստացվել է դրական եզրակացություն եւ քաղաքապետի համապատասխան որոշման ընդունումից հետո այդ տարածքները եւս կկահավորվեն ճանապարհային անհրաժեշտ նշաններով:
Քաղաքապետ Տարոն Մարգարյանը հանձնարարել է հնարավորին արագացնել գործընթացն ու սեղմ ժամկետում կայանատեղիները հանձնել շահագործման:
«Ընդամենը 5 տարի առաջ տաքսիների կայանման համար նախատեսված հատուկ տարածքներ մայրաքաղաքում առհասարակ չկային: Եվ այս նոր 25 վայրերի հատկացմամբ, ըստ էության, մայրաքաղաքում կունենանք տաքսիների շուրջ 110 կայանատեղ: Սա խոսում է հարցի նկատմամբ մշտական ուշադրության ու հետեւողականության մասին եւ տաքսիների վարորդների կողմից կայանատեղիների վերաբերյալ բարձրացվող հարցը, կարծում եմ, որոշակի առումով կարող ենք լուծված համարել: Բայցեւ այս ուղղությամբ աշխատանքները կլինեն շարունակական եւ, հնարավորության դեպքում, կքննարկենք նաեւ նոր վայրերի վերաբերյալ առաջարկները: Բացի այդ, ՃՈ հետ պետք է քննարկենք նաեւ երթեւեկությունը չխոչընդոտող եւ թույլատրելի վայրերում զբոսաշրջիկներ փոխադրող ավտոբուսների կայանման համար հատուկ տարածքների հատկացման հարցը, որը վերջին մեկ տարվա ընթացքում դարձել է օրակարգային: Ըստ այդմ, առաջարկում եմ հնարավորին սեղմ ժամկետում այս մասով եւս ներկայացնել համապատասխան առաջարկություններ»,-նշել է Տարոն Մարգարյանը:
