Հարկավոր է համատեղ ջանքերով փոխըմբռնում եւ հանդուրժողականություն սերմանել Վրաստանում, հուլիսի 24-ին լրագրողներին ասել է ՀՀ արդարադատության նախարար, Վրաստանում նախկին դեսպան Հովհաննես Մանուկյանը՝ մեկնաբանելով Թբիլիսիի Սուրբ Էջմիածին եկեղեցու մոտ հուլիսի 19-ին հայերի եւ վրացիների միջեւ ծագած կենցաղային խոշոր վեճը:
«Իհարկե, ցավում եմ միջադեպի համար: Իմ տվյալներով՝ այն կենցաղային հողի վրա է բռնկվել: Բայց, ցավոք վերաճել է խոշոր բախման: Անկախ միջադեպի պատճառներից, պետք է նշել, որ մենք կրոնական եւ ազգային հանդուրժողականության հետ կապված խնդիրներ ունենք: Հարկավոր է այս խնդիրները միասին լուծել: Այս կապակցությամբ արդեն հայտարարությամբ հանդես են եկել Վիրահայոց թեմը եւ Համայն Վրաստանի պատրիարքը: Մենք պետք է շատ մեծ նշանակություն տանք ոչ միայն մեր երկու պետությունների բարիդրացիական եւ ամուր հարաբերություններին, այլեւ՝ ժողովուրդների: Վրաստանը մեր ռազմավարական երթուղին է դեպի արտաքին աշխարհ եւ կարեւոր արտաքին քաղաքական գործընկեր: Մենք պետք է ամեն ինչ անենք, որպեսզի բարեկամ ժողովրդի հետ հարաբերություններն ամրանան եւ խորանան», - ընդգծել է Մանուկյանը:
