NEWS.am-ը զգալի կրճատումներով ընթերցողի ուշադրությանն է ներկայացնում «EurasiaNet» կայքում հրապարակված վերլուծաբան Գեորգի Լոմսաձեի հոդվածը:
«Մինչ Ռուսաստանի դեմ միջազգային պատժամիջոցներն աճում են, Հայաստանը, որը բառացիորեն ռուսական տնտեսությունից սնվող երկիր է, սպասում է, որ իրեն նույնպես կանդրադառնան: Հայ պաշտոնյաներն ու տնտեսական փորձագետները վստահ չեն ազդեցության ծավալի եւ չափի հարցում, սակայն համաձայն են, որ ազդեցություն կլինի: Ռուսաստանը Հայաստանի խոշորագույն ներդրողն է, արտահանման շուկան եւ էներգակիրների մատակարարը, այնպես որ՝ պատժամիջոցների կողմնակի արդյունքները կարող են զգացվել այս բոլոր ուղղություններով:
Ամերիկյան պատժամիջոցների վերջին փուլը, մասնավորապես, ուղղված է ռուսական «ՎՏԲ» բանկի դեմ, որը Հայաստանում խոշորագույն մասնավոր վարկատուն է: «ԱՄՆ կառավարության կողմից ընդունված միջոցառումները, որոնց նպատակը կապիտալի շուկայում «ՎՏԲ»-ի հասանելիության սահմանափակումն է, չեն ազդում բանկի գործառնական ցուցանիշների եւ վարկունակության վրա»,- հավաստում են «ՎՏԲ»-ում, որի բաժնետերերի մեծ մասի սեփականատերը ռուսական կառավարությունն է: Սակայն «Bloomberg»-ը տեղեկացրել է, որ «ՎՏԲ» խմբի միջազգային խոշոր վարկատուներն արդեն դադարեցրել են բանկին 1.5 մլրդ դոլարի չափով վարկի տրամադրումը:
Պատժամիջոցների մյուս թիրախը՝ «Գազպրոմբանկ»-ը, նույնպես գործում է Հայաստանում: Այն պատկանում է ռուսական պետական էներգետիկ հսկա «Գազպրոմ»-ին, որը, ըստ էության, Հայաստան բնական գազի միակ մատակարարն է: Հայաստանը նաեւ ներդրումային հույսեր ուներ ռուսական պետական նավթային «Ռոսնավթ» կորպորացիայից, որը նույնպես պատժամիջոցների թիրախում է: Այն ծրագրում էր գնել Երեւանի «Նաիրիտ» գործարանը:
Ազդեցության խորության վերաբերյալ գնահատականները տարբեր են, սակայն ներկայում Մաքսային միության հանդեպ վստահության կորստի վերաբերյալ պաշտոնական հայտարարություններ չկան: Միություն, որին անդամակցությունը Հայաստանին ավելի շատ կկապի ռուսական տնտեսության հետ»: