Չինաստանում ֆերմաներից մեկին գնդաձեւ կայծակ է հարվածել: Այն 170 խոզ է սպանել եւ մի կնոջ վիրավորել: Բրիտանական «The Daily Mirror» պարբերականը գրում է, որ հազվադեպ պատահող գնդաձեւ կայծակը հարվածել է Չինաստանի հարավային Խունան նահանգում գտնվող խոզի ֆերմային, ինչի արդյունքում ֆերմերի կինը՝ Յուն Լին, վիրավորվել է:
Նա պատմել է. «Այն նման էր մեծ հրե գնդի, բայց հանկարծ բաժանվեց երկու ճյուղի եւ այրեց կենդանիներին: Բոլոր գույներն աչքերիս առջեւով անցան եւ առնվազն 10 րոպե ոչինչ չէի տեսնում: Ձախ աչքս սեւացել էր, իսկ ոտքս արյունահոսում էր»:
Գնդաձեւ կայծակը հարվածել է մետաղական ցանկապատին՝ հսկայական հոսանք ուղարկելով ամբողջ շինության միջով, որտեղ 400 խոզ է եղել: Կենդանի մնացած խոզերից 100-ն այրվածքներից բուժման կարիք ունեն, իսկ հասցված ընդհանուր վնասը կարող է 50 հազար դոլար կազմել: Ականատեսները հավաստում են, որ խոզերի մի մասն էլեկտրական ուժեղ հոսանքին չի դիմացել եւ պայթել է:
