Հինգ դռնանի «Ford Fiesta»-ի թողարկումը մեկնարկելու է հաջորդ տարվա կեսին, Թաթարստանում: Լիարժեք ցիկլով արտադրությունն իրականացվելու է Նաբերեժնիե Չելնիում՝ հանրապետությունում «Ford Sollers» համատեղ ձեռնարկության (ՀՁ) երկու գործարաններից մեկում: Այս մասին գրում է «Վեդոմոստի»-ն՝ վկայակոչելով ձեռնարկության ներկայացուցչին:
Առաջիկա աշնանը նույն գործարանում կսկսվի «Ford EcoSport» մակնիշի մեքենայի արտադրությունը: «Ford Sollers»-ի աշխատակիցն ընդգծել է, որ ե՛ւ «Fiesta»-ն, ե՛ւ «EcoSport»-ը նույն հիմքն ունեն: Ռուսաստանում «Fiesta»-ի արտադրության կազմակերպման համար ներդրումները կազմում են 150 մլն դոլար: Արդիականացումից հետո գործարանի հզորությունը կկազմի տարեկան 115 հազար մեքենա, այն մասնագիտացված կլինի B-սեգմենտի մեքենաների ուղղությամբ:
«Fiesta»-ի հինգ դուռ ունեցող նոր տարբերակն արդեն թողարկվում է Եվրոպայում, սակայն Ռուսաստան չի ներկրվում: Մեքենայի ռուսաստանյան դեբյուտը տեղի կունենա Մոսկովյան ավտոսրահում, վաճառքի մեկնարկը նախատեսվում է 2015թ. ամռանը:
Ռուսական շուկայում կլինեն «Fiesta»-ի միայն տեղայնացված մեքենաներ: «Ford Sollers»-ի ներկայացուցիչը նշել է, որ այս մոդելով ապրանքանիշը կվերադառնա Ռուսաստանի ավտոշուկայի B-սեգմենտ:
