Կովկասի ինստիտուտի տնօրեն, քաղաքագետ Ալեքսանդր Իսկանդարյանը բացարձակապես վստահ չէ, որ Հայաստանի անդամակցումը Եվրասիական տնտեսական միությանը տեղի կունենա հոկտեմբերի 10-ին: Նա իր տեսակետը հայտնել է սեպտեմբերի 2-ին:
Ըստ նրա` Նուրսուլթան Նազարբաեւի հայտարարությունն այն մասին, որ Ղազախստանը կարող է դուրս գալ ԵՏՄ-ից՝ իր երկրի անվտանգության սպառնալիքի դեպքում, չպետք է ընկալել Աստանայի եւ Մոսկվայի փոխհարաբերությունների ողջ տրամաբանությունից անջատ: «Մենք սկսեցինք ուշադրություն դարձնել, երբ դա սկսեց վերաբերել Հայաստանին: ՄՄ ներսում Բելառուսը, Ռուսաստանը եւ Ղազախստանն ունեն փոխհարաբերությունների իրենց տրամաբանությունը, դա մի տիրույթ է, որտեղ մշտապես ինչ-որ կոնֆլիկտներ են լինում. նրանք տարբեր շահեր ունեն, ինչպես ցանկացած միությունում, եւ այդ տրամաբանության ներսում Ղազախստանը, Բելառուսը եւ Ռուսաստանն անընդհատ չեն համաձայնում տարբեր պատճառներով: Հայաստանը այդ երկրների միջեւ գոյություն ունեցող տարաձայնությունների պատրվակներից մեկն է», - նշել է Իսկանդարյանը` ՄՄ ներսում ստեղծված իրավիճակը համեմատելով ԵՄ-ի հետ, որի անդամներն Ուկրաինայի առիթով նույնպես տարաձայնություններ ունեն:
ՄՄ-ն, ընդգծել է Իսկանդարյանը, ստեղծվել է`թիրախ ունենալով Ուկրաինան: «Կենտրոնն Ուկրաինան էր, այլ ոչ թե Հայաստանը: Այդ ժամանակներից խիստ լուրջ փոփոխություններ են տեղի ունեցել: Ես այնքան էլ դրական չեմ վերաբերվում այդ միությանն այն իմաստով, որ չեմ կարծում, որ առաջիկայում, հաշվի առնելով Ուկրաինայի ճգնաժամը, կհաջողվի լավ գործող կառույց ստեղծել», - նշել է Ալեքսանդր Իսկանդարյանը:
Հիշեցնենք, Ղազախստանի նախագահ Նուրսուլթան Նազարբաեւը հայտարարել էր, որ հոկտեմբերի 10-ին Մինսկում ԵՏՄ անդամ երկրները կքննարկեն Հայաստանի եւ Ղրղըզստանի` ԵՏՄ-ին անդամակցության հարցերը:
