Մոլդովայի բանակն անցնում է ՆԱՏՕ-ի չափանիշներին: Այդ մասին հայտարարել է հանրապետության պաշտպանության նախարար Վալերի Տրոենկոն՝ մեկնաբանելով Ուելսում դաշինքի երկօրյա գագաթաժողովին իր մասնակցության արդյունքները:
«Մեր երկրի ռազմական ուսումնական հաստատություններում այսօր ուսումնական ծրագրերի վերափոխումներ են տեղի ունենում ՆԱՏՕ-ի մեթոդաբանության կիրառմամբ: Բացի այդ, զինվորների ու սպաների անհատական նախապատրաստումն իրականացվելու է ռազմական ուսումնավարժանքների շրջանակներում, որոնք անցկացնում են դաշինքը,- մոլդովացի նախարարի խոսքերը մեջբերում է ԻՏԱՌ-ՏԱՍՍ-ը:- Իր կողմից ՆԱՏՕ-ն պատրաստ է օգնել մեզ պաշտպանական արդի ներուժի անալիզի իրագործման հարցում եւ որոշել ոլորտները, որոնք հարկավոր է զարգացնել»:
Նրա խոսքով՝ Ուելսում նա մի շարք հանդիպումներ է անցկացրել այլ երկրների իր գործընկերների հետ, որոնց հետ քննարկել է երկկողմանի ռազմական համագործակցության ակտիվացման ծրագրերը:
Սահմանադրության համաձայն՝ Մոլդովան չեզոք երկիր է: Ընդ որում նա փոխհարաբերություններ է կառուցում ՆԱՏՕ-ի հետ գործընկերության անհատական ծրագրի հիման վրա, որի համաձայն իր զինծառայողները մասնակցում են դաշինքի խաղաղարար գործողություններին:
