![](img/news/22/78/68/default.jpg)
Հայաստանի Հանրապետական կուսակցությունը խրամատներ է փորել, բայց ինքն այնտեղ չի գնացել: Այս մասին հայտարարեց Ազգային Ժողովի Հայ ազգային կոնգրես (ՀԱԿ) խմբակցության պատգամավոր Լյուդմիլա Սարգսյանը՝ լրագրողների խնդրանքով մեկնաբանելով Հայաստանի նախագահ, ՀՀԿ ղեկավար Սերժ Սարգսյանի հայտարարությունն այն մասին, որ ՀՀԿ խմբակցության պատգամավորները չպետք է աչքաթող անեն խորհրդարանի նիստերը:
Նրա կարծիքով, այդ կոչի պատճառը «երկրում տիրող լուրջ իրավիճակի ընկալումն եւ ընդդիմության դեմ պայքարն ուժեղացնելու ձգտումն է»: «Բայց չեմ կարծում, որ նրանք կարող են որեւէ հիմք ունենալ, որպեսզի դիմակայեն ընդդիմությանն ու ինչ-որ կերպ փրկեն իրենց դեմքը: Եթե դուք ուսումնասիրեք ՀՀԿ պատգամավորների՝ նիստերի դահլիճ այցելությունների վիճակագրությունը, ապա ինքնաբերաբար կհանգեք եզրակացության. ՀՀԿ-ն խրամատներ է փորել, բայց ինքն այնտեղ չի գնացել»,- հայտարարեց Լյուդմիլա Սարգսյանը:
Նշենք, որ սեպտեմբերի 9-ին կայացած ՀՀԿ խորհրդի նիստի ժամանակ Սարգսյանը հայտարարել էր, որ պատգամավորի գլխավոր խնդիրն օրենսդրական գործունեությունն է, եւ խորհրդարանականներին կոչ էր արել անձնական ու ոչ անձնական բնույթի բոլոր հարցերը երկրորդ պլան մղել: