Հայաստանի՝ մեծությամբ երկրորդ քաղաք Գյումրիում ցանկանում են վերականգնել կազակների ուղեկալն ու որբերի կադետական կորպուսը: Այս մասին NEWS.am-ի թղթակցին տեղեկացրեցին Հայ-ռուսական կազակական «Нить» եղբայրությունում: Նախագծի համար միջոցները հավաքագրում է «Կազակների ուղեկալ» բարեգործական հիմնադրամը:
Ուղեկալը, որը հայտնի է «Կազակների ուղեկալ» անունով, քաղաքում գոյություն է ունեցել 1804 թվականից մինչեւ Առաջին աշխարհամարտը: Այնտեղ ծրագրվում է հիմնել Կազակների կադետական կորպուսը՝ ծնողազուրկ երեխաների առաջնային ընդունելության իրավունքով, եւ Հայ-ռուսական հոգեւոր մշակույթի կենտրոն:
Կազակներն առայժմ իրենց ուժերով են բարեկարգում տարածքը. այն մաքրում են քարերից, խոտից, բարեկարգում են պատերը:
Հայ-ռուսական կազակական «Нить» եղբայրության՝ Շիրակի մարզի տարածաշրջանային ատաման, գնդապետ Արզուման Պողոսյանի խոսքով՝ զորանոցներում կարող են տեղավորվել կազակության շուրջ 800 անդամներ, ովքեր պայմանագրային հիմունքներով ծառայում են Հայաստանի Զինված ուժերում:
«Այստեղ, հավանաբար, նոր զորանոցներ կկառուցենք: Կփորձենք պահպանել պատմական կոլորիտը: Եվ ախոռներ կհիմնենք. էլ ինչ կազակ՝ առանց ձիու»,- հավելեց նա:
