Չի լինում այնպես, որ մի կողմից Վլադիմիր Գասպարյանը հայտարարում է, թե առնչություն չի ունեցել Մարտի 1-ին, մյուս կողմից էլ հաստատում է, որ հանձնարարություն էր ստացել Կառավարության շենքը պահպանել: Այս մասին NEWS.am-ի թղթակցին հայտնեց Մարտի 1-ի գործով «փաստահավաք խմբի» նախկին անդամ« ՊՆ նախկին փոխնախարար Անդրանիկ Քոչարյանը՝ անդրադառնալով ոստիկանապետ Վլադիմիր Գասպարյանի հայտարարություններին:
Նա նշեց, որ քննչական խումբը տեղեկատվություն ուներ, որ զինվորական ոստիկանությունը ծառայություն տանում է Կառավարության շենքի մոտ, որովհետեւ այնտեղ տեղակայված են եղել իրենց տեխնիկական միջոցները, որը, իրենց կարծիքով, եղել է անթույլատրելի եւ նշանակում է, որ զինված ուժերի որոշակի մասնակցությունն է եղել մարտիմեկյան դեպքերին:
«Մենք որոշակի ուսումնասիրություններ ունեինք արած, թե ինչ ընթացք է ստացել հետագայում նախաքննական մարմնի կողմից, դժվարանում եմ ասել, որովհետեւ փաստահավաք խումբը չհասցրեց ավարտել ձեռքի տակ եղած տեղեկատվությունը: Եթե Վլադիմիր Գասպարյանն էլ է հաստատում, իսկ դա չհաստատել հնարավոր չէ, որովհետեւ դա ֆիքսված է թե տեսախցիկներով, թե առանձին նյութերով, բնականաբար նախաքննական մարմինը դրանից ելնելով՝ պետք է ուսումնասիրի 0038 հրամանի առկայությունն ու դրա հետեւանքները, այդ հրամանի խնդիրն է որ պետք է լուծում ստանա: Պաշտպանության նախարարը հրաման էր ստորագրել, որը ապացուցում է զինված ուժերի մասնակցությունը մարտի 1-ի դեպքերին, իսկ ռազմական ոստիկանությունը զինված ուժերի ստորաբաժանումն է»,-ասաց փաստահավաք խմբի նախկին անդամը:
Ինչ վերաբերում է Վլադիմիր Գասպարյանի հարցաքննությանը, ապա Անդրանիկ Քոչարյանը դա համարում է նախաքննական մարմնի խնդիրը, «իրենք պետք է գործողություններ իրականացնեն, որի մասին տեւական ժամանակ է՝ հասարակությունը տեղեկություն չունի՝ նախաքննական մարմին կա, թե չկա, ղեկավարը փոխվել է, թե ոչ, ընդհանրապես մարտի 1-ի թեման ինչ վիճակում է».«Խնդիրը նախաքննական մարմնի գործողությունների մեջ է, որը այս պահին ըստ էության գոյություն չունի, իսկ եթե գոյություն չունի այդ մարմինը եւ ղեկավարը չկա, ի՞նչ հարցաքննեն նրան: Եթե մի բան գաղտնի են պահում, նշանակում է՝ այդ ղեկավարը գոյություն չունի իրականում: Մարտի 1-ին առնչություն ունեցել են բոլոր պետական կառույցները, ուրիշ բան՝ նրանք գործել են իրենց սահմանադրական լիազորությունների շրջանակում, թե ոչ Զինված ուժերի մասնակցությունը վիճահարուց հարց է, որը խոսում է այն մասին, որ նրանք իրավունք չունեին մասնակցել մարտիմեկյան դեպքերին»:
Հիշեցնենք, որ Վլադիմիր Գասպարյանը ասել էր հետեւյալը.«Ես որպես էն ժամանակ ռազմական ոստիկանության պետ, հիմա որպես ոստիկանության պետ, ուղղակի չեմ զբաղվել այդ գործով: Մարտի մեկին իմ մասնակցությունը եղել է այնքանով, որ ռազմական ոստիկանությունը կառավարության շենքի պահպանությունն է վերցրել իր վրա, եւ ես օպերատիվ խմբով արդեն դեպքի վայրից հետո տեղազննություններին մասնակցել ենք նույնպես: Քննության ընթացքի հետ ես ուղղակի ծանոթ չեմ, եւ կարծում եմ՝ այնքան ծեծված թեմա է. ես ինչ էլ ասելու լինեմ, ասելու եմ այն, ինչ որ կան լրատվամիջոցներում»:
