Կիբերանվտանգության հարցերում մասնագիտացած See Egypt ընկերությունն այսուհետ ուշադիր հետեւելու է եգիպտացիների առցանց-հաղորդակցություններին: Ընկերությունը Եգիպտոսի իշխանություններին աննախադեպ հնարավորություն է ընձեռում մանրակրկիտ վերլուծության ենթարկել Skype-ի, Facebook-ի, Twitter-ի, YouTube-ի եւ այլ կայքերի տվյալները:
Ըստ BuzzFeed-ի, ամռանը See Egypt-ը հաղթել է եգիպտական կառավարության հետ պայմանագիր կնքելու համար նախատեսված մրցույթում, ինչի արդյունքում Deep Packet Inspection տեխնոլոգիայի միջոցով ցանցային փաթեթների ստուգման ծառայություններ է մատուցելու իշխանություններին: Այն համացանցի օգտատիրոջ աշխարհագրական տեղակայման, նրան հետեւելու եւ ընդլայնված մոնիթորինգի հնարավորություն է ընձեռում:
«Մենք ուշադրություն ենք դարձնում ցանկացած հաղորդագրության, տեղեկատվության ցանկացած փոխանակման, որն անհանգստացնող ենք համարում կամ որին կցանկանայինք ուշադիր հետեւել: Մենք հետեւում ենք իսլամականների միջեւ նամակագրությանը կամ նրանց, ովքեր քննարկում են իսլամականությունը»,- BuzzFeed-ին ասել է եգիպտացի պաշտոնյան, ով չի ցանկացել հրապարակել անունը:
Օրերս Եգիպտոսի ոչ ավանդական սեռական կողմնորոշում ունեցողները նույնասեռականներին կոչ են արել չօգտվել ծանոթությունների Grindr հավելվածից այն բանից հետո, երբ լուրեր են տարածվել այն մասին, որ եգիպտացի պաշտոնյաներն այդ ռեսուրսն օգտագործում են՝ եգիպտական տղամարդ-նույնասեռականներին հետեւելու եւ ձերբակալելու համար: Այս մասին գրում է NEWSru.com-ը:
Հոդվածի հեղինակները ներկայացնում են Եգիպտոսի ներքին գործերի նախարարության հրապարակած պարզաբանումը, որտեղ նշվում է, թե ինչին են պատրաստվում հետեւել. տարածաշրջանային, կրոնական, ռասսայական եւ դասակարգային հակասություններ, լուրերի տարածում, հերյուրանք, սարկազմ, անպարկեշտ բառերի օգտագործում, ծայրահեղականության, բռնության եւ այլակարծության խրախուսում, ցույցերի, նստացույցի եւ ապօրինի գործադուլի կոչ, պոռնոգրաֆիա, անպարկեշտություն եւ անբարոյականություն, պայթուցիկ նյութերի պատրաստման եւ հարձակման տակտիկայի ուսուցանում, հակառակորդների հետ հարաբերությունների կարգավորման կոչեր, կեղծիքի տարածում, հրաշքների մասին տեղեկությունների տարածում եւ այլն:
