Եռյակը (ՀԱԿ, ԲՀԿ եւ «Ժառանգություն») որեւէ կապ չունի պետության եւ հասարակության շահերի հետ: Այս մասին NEWS.am-ի թղթակցի հետ զրույցում ասաց Քաղաքական եւ միջազգային հետազոտությունների հայկական կենտրոնի փորձագետ Ռուբեն Մեհրաբյանը՝ անդրադառնալով հարցին, թե ինչու եռյակը հոկտեմբերի 10-ի հանրահավաքում չի անդրադառնալու Հայաստանի՝ ԵՏՄ անդամակցությանը:
Ռուբեն Մեհրաբյանը շեշտեց, որ նրանք Հայաստանի ԵՏՄ անդամակցությունը կարեւոր չեն համարում, ինչը, իր կարծիքով, ուղղակի աղետաբեր կլինի Հայաստանի արտաքին քաղաքականության համար, մեկ խոսքով կարելի է գնահատել որպես պետականության վթար:
«Նրանց կողմից դա չկարեւորելը խոսում է այն մասին, որ այդ մարդիկ ընդհանրապես քաղաքական հարթության վրա չեն գտնվում, պետականության եւ հասարակության խնդիրների հետ որեւէ կապ չունեն, ինչ կանեն եւ չեն անի այդ հանրահավաքում, առանձնապես որեւէ մեկին չի հետաքրքրելու, չեմ կարծում, որ սա ինչ-որ քաղաքական հարթության վրա հաջողության շանսեր է, չկա նման բան»,-ասաց փորձագետը:
Նա նշեց, որ Հայաստանի իշխանությունը այսօր բավականին թույլ է, դրա պատճառը իշխանության ներսում է, իշխանությունը հնարավորություններ ուներ շտկելու այդ իրավիճակը, բայց մսխեց այդ հնարավորությունը: «Հաշվի առնելով առաջիկա մարտահրավերները՝ իշխանությունը այդ մարտահրավերներին մոտենում է առավելագույնս թուլացած, ինչն էլ գայթակղություն է առաջացնում տարբեր խմբերի կամ խմբակների կողմից փորձել արտաքին ուժերի օգնությամբ կրկնել այն, ինչ տեղի ունեցավ 1998թ, այսինքն՝ ներիշխանական հեղաշրջման զգուշավոր հայտ է սա՝ կստացվի արդյոք, այսպիսի ներքին լռակյաց հարցադրմամբ»,- ասաց Ռուբեն Մեհրաբյանը: