Կապանը բազմաթիվ զոհված զինվորներ ու ազատամարտիկներ է տվել, իրենք այսօրվա Հայաստանի համար չեն արել այդ: Արել են, որպեսզի մենք բոլորս ազատ ապրենք, որ հայ երիտասարդը Հայաստանում ապրի եւ ոչ թե իր երկիրը լքի ու հեռանա: Կապանի Գարեգին Նժդեհի հրապարակում այսօր՝ սեպտեմբերի 28-ին կայացած ոչ իշխանական եռյակի («Ժառանգություն, ԲՀԿ, ՀԱԿ») հերթական իրազեկման հանրահավաքի ժամանակ առանց բարձրախոսի շարունակած ելույթում հայտարարեց «Ժառանգություն» կուսակցության փոխնախագահ Արմեն Մարտիրոսյանը։

Նա անդրադարձավ խոչընդոտներին, որոնք երկրի տարբեր քաղաքներում ստեղծում են իշխանության ներկայացուցիչները։ Այդպիսի դեպք այսօր եղել է նաեւ Սիսիանում, որտեղ քաղաքապետի հանձնարարականով ճանապարհները փակվել են՝ ժողովրդին թույլ չտալով միանալ հավաքին: «Իշխանություններն այսօր կարող են տարբեր քայլեր ձեռնարկել, ինչպես այսօր Սիսիանում էր կամ երեկ Հրազդանում։ Բայց մենք իրավունք չունենք հետ դառնալու, որովհետեւ Հայաստանն ենք կորցնելու, որովհետեւ արտագաղթը հենց այսպես է առաջացել»,- հավելեց Արմեն Մարտիրոսյանը։

Ըստ նրա, հայը պետք է ազատ ապրի, ոչ թե ֆեոդալական պայմաններում։ «Մենք ուրիշ ճանապարհ չունենք, քան իշխանափոխություն իրականացնելը, միասին երեք քաղաքական ընդդիմադիր ուժերով առաջ ենք շարժվում, եւ ես համոզված եմ, որ ինչպես նախորդ տարի նախագահական ընտրություններին, այնպես էլ այս անգամ սյունեցիները եւս կմիանան եւ կքայլել դեպի իշխանափոխություն»,-ամփոփեց ոչ իշխանական եռյակի ներկայացուցիչը։