Կասպյան 4-րդ գագաթաժողովի արդյունքներով «Հյուսիս-Հարավ» տրանսպորտային միջանցքի համալրման առումով ե՛ւ Իրանի, ե՛ւ Ռուսաստանի կողմից իրական գործողություններ են ձեռնարկվել: Այս մասին NEWS.am-ի թղթակցի հետ զրույցում հայտարարեց քաղաքագետ-իրանագետ, Ռազմավարական մշակույթի հիմնադրամի փորձագետ Կարինե Գեւորգյանը:
Անդրադառնալով Կասպյան գագաթաժողովի արդյունքներին եւ ընդունված որոշումներին՝ նա նշեց, որ բացի Կասպից ծովի կարգավիճակից՝ այդ հանդիպումը եւս մեկ կարեւոր ասպեկտ է ունեցել. «Հյուսիս-Հարավ» տրանսպորտային միջանցքը:
«Այդ թեման քննարկվել է: Ե՛վ Իրանի, ե՛ւ Ռուսաստանի կողմից տրանսպորտային այդ միջանցքի համալրման առումով իրական գործողություններ են ձեռնարկվել, եւ այն, որ մերձկասպյան հինգ երկրները մասնակցելու են այդ միջանցքին, շահեկան է բոլոր կողմերի համար»,- ընդգծեց Կարինե Գեւորգյանը:
Հիշեցնենք, որ սեպտեմբերի 29-ին Աստրախանում կայացած Կասպյան 4-րդ գագաթաժողովի ընթացքում նշվել է, որ նոր գլոբալ նախագծերի համար նաեւ հզոր ենթակառուցվածքներ են անհրաժեշտ: Հեռանկարային նախագծերից մեկն էլ՝ «Հյուսիս-Հարավ» տրանսպորտային միջանցքը, Արեւմտյան եւ Հյուսիս-արեւմտյան Եվրոպայի երկրները Ռուսաստանի, Կասպյան ավազանի եւ Իրանի միջոցով կապելու է հարավային Ասիայի հետ:
Ծրագրվում է նաեւ երկաթուղային օղակ ստեղծել Կասպից ծովի շուրջ եւ համակարգում ներառել տարածաշրջանի հիմնական նավամատույցները: Գագաթաժողովի մասնակիցները խոստովանել են, որ այդ միասնական օրգանիզմը կարագացնի բեռների մատակարարումը եւ ներդրումներ կգրավի:
