Հայտնի կանանց փաստաբանը, որոնց անձնական բնույթի լուսանկարները տեղադրվել էին համացանցում, Google կորպորացիայի դեմ 100 մլն դոլարի պահանջով հայց է նախապատրաստում: Այս մասին գրում է MIGnews-ը:
Փաստաբանի խոսքով՝ Google-ը լուսանկարները ժամանակին չի ջնջել որոնման համակարգից եւ միլիոններ է վաստակել կանանց զոհելու հաշվին: Ավելի քան հազար տուժած կնոջ շահերը պաշտպանող իրավաբանը Google-ի հիմնադիրներին նամակ է ուղարկել, որում նրանց մեղադրել է ոչ էթիկական պահվածքի համար:
Նամակում Սինգերը տեղեկացրել է, որ դեռեւս 4 շաբաթ առաջ Lavely & Singer ընկերությունը ծանուցում է ուղարկել՝ լուսանկարները ջնջելու խնդրանքով: Դրանից հետո ընկերությունը եւս շուրջ տասը նամակ է ուղարկել, սակայն լուսանկարները մինչեւ հիմա հասանելի են BlogSpot-ում եւ YouTube-ում:
Գործակալությունը հիշեցնում է, որ սեպտեմբերին հաքերները երեք փուլով հոլիվուդյան աստղերի հարյուրավոր ինտիմ լուսանկարներ են տարածել համացանցում: Զոհերի թվում են դերասանուհի Ջենիֆեր Լոուրենսը, մոդել Քեյթ Ափթոնը, հեռուստաաստղ Քիմ Քարդաշյանը. երգչուհի Ավրիլ Լավինը եւ այլք: Համարվում է, որ սա հայտնիների հետ կապված խոշորագույն հաքերային սկանդալն է: