Ես ոչ մի դեպքում ինձ վրա պատասխանատվություն չեմ վերցնի խոսելու ժողովրդի անունից: Այս մասին, այսօր՝ հոկտեմբերի 3-ին, ԱԺ-ում ճեպազրույցների ժամանակ հայտարարել է ՀՅԴ խմբակցության քարտուղար Աղվան Վարդանյանը՝ մեկնաբանելով «Ժառանգություն» խմբակցության ղեկավար Ռուբիկ Հակոբյանի հայտարարությունը, թե եռյակը կանի այնպես, ինչպես կորոշի ժողովուրդը:
«Բոլոր նրանք, որոնք ասում են, որ ժողովուրդը կգա հանրահավաքի եւ ինքը կորոշի ինչ անել, իսկ մենք կիրականացնենք, քաղաքական անպատասխանատվություն են ցուցաբերում: Դա պարզ մանիպուլյացիա է, պետք չի ժողովրդի անվան տակ թաքնվել: Ես ինչպես կարող եմ ասել, թե ինչ է ուզում ժողովուրդը: Ժողովրդին ուղղորդում են, եւ ժողովրդի մի մասը գնում է նրանց հետեւից»,-ասել է ՀՅԴ խմբակցության քարտուղարը:
Ինչ վերաբերում է քառյակի կողմից դեռեւս ամռանը առաջ քաշված 12 կետերի հետ կապված կառավարության պատասխանին, Աղվան վարդանյանն ասել է, որ դժգոհ է այն ոճից, որով տրվել է պատասխանը, որից բխում է մեկ բան. Այդ պահանջները ոչինչ չեն նշանակում իշխանությունների համար: