Հայաստանում ժողովրդավարական ընտրություններ եղել են միայն Լեւոն Տեր-Պետրոսյանի, եւ Վազգեն Սարգսյան, Կարեն Դեմիրճյան զույգի ընտրության ժամանակ: Այս մասին այսօր՝ հոկտեմբերի 4-ին, Իջեւան քաղաքում խորհրդարանական ոչ իշխանական եռյակի (Ժառանգություն, ՀԱԿ, ԲՀԿ) հանրահավաքին ասաց Հայաստանի ժողովրդական կուսակցության փոխնախագահ Ստեփան Մինասյանը:
«Մենք այժմ տեսնում ենք, որ ավելի քան 15 տարի Հանրապետական կուսակցության մենիշխանության պատճառով երկիրն ընկղմվել է համընդհանուր ճգնաժամի մեջ: Սա այն գլխավոր խնդրի հետեւանքն է, թե ինչպես ենք մենք ձեւավորում իշխանությունը: Մենք հրապարակում ենք, որ կառուցում ենք ժողովրդավարական պետություն, բայց այդ խնդրի գլխավոր գործիքը արդար եւ բաց ժողովրդավարական ընտրություններն են: Դա եղել է միայն այն ժամանակ, երբ ընտրվում էր Լեւոն Տեր-Պետրոսյանը, երբ Վազգեն Սարգսյան-Կարեն Դեմիրճյան «Միասնություն» քաղաքական ուժն էր ընտրվում: Որեւէ անգամ բողոք չեղավ, որովհետեւ այդ ընտրությունը ժողովրդի սրտով էր»,- ասաց Ստեփան Մինասյանը:
Ստեփան Մինասյանի խոսքով՝ 2003թ. սկսած բոլոր ընտրությունները կեղծվում են: Ըստ նրա՝ 2003թ. ընտրվել էր Ստեփան Դեմիրճյանը, սակայն նշանակվել այլ մարդ, 2008 թ. ընտրվել էր Լեւոն Տեր-Պետրոյանը, սակայն «իշխանությունը հոգեվարքի մեջ էր, նույնիսկ 10 զոհի գնով գնաց իշխանությունը պահպանելուն»:
«2013թ. ընտրվեց ընդդիմության ներկայացուցիչ Րաֆֆի Հովհանիսյանը, բայց գիտեք՝ ինչպես կեղծվեց: Եվ 2013թ. նախագահ դարձավ այն մարդը, որը, ըստ էության, գյուղական համայքների նախագահ դարձավ: Բոլոր խոշոր քաղաքներում հաղթեց ընդդիմության թեկնածուն»,-ասաց նա՝ նշելով որ դա այն բանի հետեւանքն է, որ այսօր հանցագործության մեջ մեղադրվողը կարող է բարձր պաշտոն ստանալ՝ նկատի ունենալով Սյունիքի մարզպետ վերանշանակված Սուրիկ Խաչատրյանին։