ՀՅԴ-ն առաջիկայում իր պաշտոնական տեսակետը կներկայացնի սահմանադրական բարեփոխումների հայեցակարգի մասին, սակայն, ըստ նախնական գնահատականի, փաստաթուղթը պարունակում է անհրաժեշտ ուղղությունը, որը հույս է ներշնչում, թե պետք է աշխատել նախագահական կառավարման համակարգը խորհրդարանականով փոխարինելու գործընթացի վրա, հոկտեմբերի 20-ի լրագրողներին հայտնել է ՀՅԴ խորհրդարանական խմբակցության նախագահ Արմեն Ռուստամյանը` պատասխանելով հարցին, թե ինչպես է կուսակցությունը գնահատում սահմանադրական բարեփոխումների հայեցակարգը:
Ըստ Ռուստամյանի` ՀՅԴ-ն հայտարարել է, որ չի մասնակցելու սահմանադրական բարեփոխումների գործընթացին, եթե արմատական կառուցողական փոփոխություններ չկատարվեն: «Մենք մոտեցումներ ունենք, որոնք լիարժեք չեն ներկայացված սահմանադրական բարեփոխումների հայեցակարգում այն տեսակետից, որ խորհրդարանական կառավարման ձեւերը նույնպես տարբեր են: Եվ մենք որոշ հարցեր ունենք դրա հետ կապված», - հավելել է պատգամավորը:
Ի պատասխան հարցին, թե ինչպես է գնահատում այն հանգամանքը, որ ՀՀ նախագահը իր տեսակետը կհայտնի միայն մի քան ամիս անց՝ արդեն 2015-ին, Ռուստամյանը նշել է. «Եթե մարդիկ, որոնք հայտարարում են, թե նախագահը «զիջել է», ծանոթ լինեին հրամանագրին, նման հայտարարություններ չէին անի: Հրամանագրում հստակ նշված են գործողությունների ժամկետներն ու հերթականությունը. Ներկայացված է սահմանադրական փոփոխությունների հայեցակարգը: Երբ նախագահն այն հաստատի, 10 ամսվա ընթացքում սահմանադրական փոփոխությունների հանձնաժողովը կնախապատրաստի նախագիծը: Այժմ քաղաքական խորհրդակցությունների շրջանն է»:
Ինչ վերաբերում է շրջանառվող վարկածին, թե նախագահը հետաձգել է իր գնահատականի հրապարակումը խորհրդարանական եռյակի պահանջի պատճառով, ապա, ըստ Ռուստամյանի, դա չի համապատասխանում իրականությանը: «Չեմ կարծում, որ դա խորհրդարանական եռյակի ճնշման հետեւանքն է: Դա գործընթացի տրամաբանական շարունակությունն է»:
