Մեր ամբողջ ազգին տանջում է նախարար, վարչապետ եւ նախագահ դառնալու միտքը: Այդ մասին այսօր՝ հոկտեմբերի 20-ին, լրագրողներին հայտարարեց Ազգային ժողովի նախագահ Գալուստ Սահակյանը՝ մեկնաբանելով ԲՀԿ կուսակցության առաջնորդ Գագիկ Ծառուկյանի՝ նախագահ դառնալու մտադրությունը: «Ցավալի է, որ ոչ ոք գիտնական դառնալու ցանկություն չունի, մինչդեռ մենք քայլում ենք գիտությունը զարգացնելու ճանապարհով, քանի որ դրանով է պայմանավորված երկրի հզորությունը», - ասաց Սահակյանը:
Ի պատասխան հարցին, որ Սյունիքի սկանդալային հայտնի մարզպետ Սուրիկ Խաչատրյանը եւ Երեւանի քաղաքապետ Տարոն Մարգարյանը ձգտում են դառնալ «գիտնականներ», համենայն դեպս, հոգացել են գիտական աստիճանի մասին, Գալուստ Սահակյանը պատասխանեց. «Գիտնականներ չեն դառնում, գիտական աստիճանը պաշտպանում են: Ես միշտ ունեցել եմ գիտնական դառնալու հնարավորություն, սակայն կարծում եմ, որ մարդ պետք է մեկ գործով զբաղվի. լինել կամ գիտնակա՞ն, թե՞ քաղաքական գործիչ»:
