Մեկ տարվա ընթացքում էստոնական Delfi լրատվական կայքին հայտնի կդառնա կայքի մեկնաբանությունների գործով Մարդու իրավունքների Եվրոպական դատարանի որոշումը: Այս մասին NEWS.am-ի թղթակցի հետ զրույցում տեղեկացրեց էստոնական խոշորագույն կայքի գլխավոր խմբագիր Ուրմո Սոոնվալդը:
Գործը ՄԻԵԴ-ի Գերագույն պալատում քննվում էր այս տարվա հուլիսին: Ավելի վաղ ազգային դատարանները համարել էին, որ կազմակերպությունը պատասխանատվություն է կրում ընթերցողների թողած մեկնաբանությունների համար, այդ թվում՝ վիրավորական արտահայտությունների: ՄԻԵԴ-ը նաեւ ընդունել է, որ ընթերցողների թողած վիրավորական մեկնաբանությունների համար կազմակերպությանը պատասխանատվության կանչելը խոսքի ազատության խախտում չէ:
«Ով պետք է ստուգի, արդյո՞ք դա ճիշտ մեկնաբանություն է եղել, թե՝ ոչ: Համացանցը պետք է ազատ լինի: Բոլոր մարդիկ պետք է ասեն այն, ինչ ցանկանում են ասել, եթե, իհարկե, դա պարկեշտության շրջանակում է: Մեղավոր են ոչ թե համացանցը եւ որոշակի կայքը, այլ մարդը»,- ասում է Սոոնվալդը:
Նրա խոսքով, մինչեւ դատարանի վերջնական որոշումը կայքն աշխատում է նախկինի պես. 5 մոդերատորներ կան, որոնք հետեւում են մեկնաբանություններին:
Միաժամանակ, ըստ խմբագրի, երբ սկսվեց Ուկրաինայի ճգնաժամը, իրենք շատ հոդվածներ փակեցին մեկնաբանությունների համար՝ վիրավորական եւ անպարկեշտ բառապաշարի համար, քանի որ նման հոսքի դեմ պայքարելն անհնար է: «Այս գործը ոչ թե Delfi-ի դեմ է, այլ բոլորի»,- հայտարարեց նա:
ՄԻԵԴ-ի Գերագույն պալատը վերջին ատյանն է, ուր կայքը կարող էր դիմել, եւ որոշումը կարող է նախադեպ դառնալ այս ոլորտի դատական գործերի համար:
Ուրմո Սոոնվալդը մասնակցել է Եվրամիության գործունեությանը հասարակությանը տեղեկացնելու վերաբերյալ սեմինարին եւ Հայաստանում ֆինանսավորվող նախագծերին, որոնք կազմակերպվել են Արեւելյան գործընկերության էստոնական կենտրոնի կողմից՝ Տարածաշրջանային հետազոտությունների կենտրոնի եւ Հայաստանում Էստոնիայի դեսպանի կողմից:
